Mahajjata miliyan biyu ke hawan Arfa

Wannan rana dai shi ke zama rana mafi mahimmaci a cikin ranakun ayyukan hajji ga musulmai da suka samu damar ziyartar kasa mai tsarki, wannan ya sa dubban Alhazai suka dukufa wajen mika kukan su ga madaukakin tsariki dan neman biyan bukatunsu. Wani mahajjaci daga Najeriya, ya yi addu'ar neman hadin kai da zaman lafiya.

"Na zo hajji, kuma na roko Allah ma daukakin tsarki da ya hada kan musulman duniya, ya kuma baiwa Najeriya da sauran kasashen duniya zaman lafiya."

Tarihi dai ya nuna cewa karni 14 da suka shude, Manzon Allah tsira da aminci su tabbata a gareshi ya gabatar da huduba ga musulmai a wannan wuri. Hukumomin kasar Saudiya sun tsaurara matakan tsaro da ma'aikatan jinya dan baiwa mahajjata damar gudanar da ibada cikin kwanciyar hankali dan kaucewa tirmitsitsi da zai cutar da al'umma.