1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Labarai

Jamus zata ta ka rawar gani wajen warware rikicin Iraki

A tattaunawar da ya yi da sakatariyar harkokin wajen Amurka C-Rice a birnin Washington, ministan harkokin wajen Jamus F-W Steinmeier ya tabo hanyoyin da za´a bi don warware rikicin kasar Iraqi. Dukkan mutanen biyu sun kuma yi musayar yawu dangane da shigar da Jamus a shawarwari na diplomasiya kamar yadda rahoton Baker da Hamilton ya ba da shawara. Mista Steinmeier ya ce ba a tsayar da shawara akan wannan batu tukuna ba. Ya ce da farko dole sai gwamnatin Amurka ta shawarta game da matakan da zata dauka nan gaba a Iraqi. Sakatariyar harkokin wajen Amurka ta sake nuna adawa da yin shawarwari kai tsaye da Syria da kuma Iran. Ta ce dukkan kasashen biyu na marawa ayyukan ta´addanci baya. Ta kara da cewa kafin a yi haka dole sai Iran ta yi watsi da shirinta na nukiliya.