Iraki na fuskantar hadarin fadawa cikin mummunan yakin basasa

Babban sakataren MDD Kofi Annan ya sake yin gargadin cewa Iraqi na cikin mummunan hadarin fadawa cikin wani yakin basasa. A lokacin da yake magana a birnin New York Annan ya ce idan aka ci-gaba da tashe tashen hankula a kasar to akwai barazanar rugujewar kasar ta Iraqi. Babban sakataren na MDD ya yi kira ga gamaiyar kasa da kasa da ta tsara wani gagarumin shiri na tsawon shekaru 5 don sake gina Iraqin wadda yaki ya daidaita. Wannan gargadin ya zo ne bayan mutane sama da 40 sun raasa aryukansu a fadin kasar ta Iraqi a jerin hare haren bama-bamai. Mutum 22 suka rasu a birnin Tal Afar dake arewacin Iraqin lokacin da wani dan kunar bakin wake ya ta da bam a cikin wata kasuwa a jiya litinin. Sannan a Ramadi dake yamma da Bagadaza mutum 13 sun mutu a wani harin kunar bakin wake da aka kai a wajen wani wurin daukar ´yan sanda aiki. Yayin da mutum 8 suka kwanta dama sakamakon harbe harbe a birnin Baquba.