Firaministan Iraqi ya maida Martani ga Amurka

P/M Iraqi Nuri al-Maliki ya maida martani da kakkausar harshe ga sukar da Amurka ke yiwa gwamnatin sa da gazawa wajen shawo kan tarzoma da kuma sasanta kan alúmar Iraqi. Nuri al-Maliki ya yi watsi da sukar yana mai cewa babu wanda yake da ikon sanyawa gwamnatin sa wadda alúma suka zaɓa wani ƙayyadadden lokaci. A hannu guda kuma shugaban Amurka George W Bush yayi kashedin cewa ficewar Amurka daga Iraqi ka iya haifar da yanayi irin wanda ya wakana a kudu maso gabashin Asia, bayan da sojojin Amurka suka fice daga Vietnam. Yayin da yake jawabi ga tsoffin sojoji a Missouri, Bush yace Miliyoyin jamaá fararen hula waɗanda basu ji ba basu gani ba, sun ɗanɗana kuɗar su a sakamakon ficewar da Amurkan ta yi daga Vietnam. Ya kuma jaddada goyon bayan sa ga P/M Iraqi Nuri al-Maliki wanda a yanzu ya sami kan sa cikin wadi na tsaka mai wuya.