Dinke baraka tsakanin Turkiyya da Amirka
March 30, 2017Talla
Babban burin ziyarar sakataren harkokin wajen na Amirka dai shi ne, a kan gyara ga barakar da aka samu tsakanin Turkiyya da manyan kasashe membobin kungiyar tsaron NATO. Tillerson ya yi ganawar kusan sa'o'i biyu da Shugaba Racep Tayyip Erdogan na Turkiyya, kana daga bisani ya sadu da Firimiyan kasar ta Turkiyya Binali Yildirim. Batun kasar Siriya na cikin jadawalin ganawar, inda Turkiyya ke neman sai Amirka ta daina goyon bayan da take bai wa Kurdawan Siriya. A ranar Laraba dai Turkiya ta sanar da kawo karshen ayyukan sojojinta a kasar Siriya, to amma ba ta ce ko za ta janye sojojinta da ke cikin kasar ta Siriya ba.