Dakarun Najeriya sun ceto mutum 149

Dakarun gwamnatin Najeriya, sun tabbatar da kubutar da wasu mata da kananan yara 149 wadanda mayakan kungiyar Boko Haram suka yi garkuwa da su a kauyen Yerimari Kura, na jihar Borno. Sanarwar da sojin kasar suka yada a wannan Lahadi, ta ce sun ceto mutanen ne a wani farmaki da suka kai wa mayakan na Boko Haram, inda suka kashe uku tare da kama wasu biyar daga cikinsu a jiya Asabar.

Dakarun na Najeriya sun kuma ce suna bincika lafiyar matan da kuma yaran 149, kamar yadda kakakin mayakan sintirin Lafiya Dole Onyema Nwachukwu ya tabbatar. A share guda kuwa, sun kama wasu 'yan kunar bakin wake biyu a kauyen Mandanari a jiyan, sai dai daya daga cikinsu ya mutu lokacin da jigidar bama-baman da ke a jikinsa ta tashi, akwai wasu fararen hula uku da suka ji rauni.