Christina Kirchner ta lashe zaɓen shugaban ƙasar Argentina

A lokacin da ta hau kan wani dandamali a otel din Interamericana, sa´o´i 3 bayan an rufe tashoshin zabe, magoya bayan Christina Kirchner sun barke da murna da sowa. Da farko ta yi kira da hadin kan al´umar kasar.

2. O-Ton Kirchner:

“Mun yi nasara da gagarumin rinjaye watakila mafi yawa tun bayan girke demukiradiya a kasar nan. Haka baya nufin an nuna mana wata gata ce a´a a daura da haka babban nauyi aka dora mana musamman bisa la´akari da wannan amincewa da al´umar Argentina suka yi mana.”

Bayan kai ruwa rana da aka yi ta yi da ´yan adawa a lokacin yakin neman zabe akan zargin cin hanci da kuma yin katsalandar a binciken hauhaar farashin kaya, yanzu Christina na kokarin gabatar da kanta a matsayin shugabar al´umar Argentina gaba daya. Baya ga haka ta nuna wani nauyi na musamman dake kanta a dangane da harkokin da suka shafi mata.

2. O-Ton Christina:

“Ina kira ga ´yan´uwana mata. Na san cewa akwai babban nauyi da ya kamata mu sauke. A matsayin mu na mata zamu iya ba da gudunmawa a fannoni da dama na fasalta iyali da ma tsarin siyasar duniya baki daya, wannan kuwa shi ne mafi muhimmanci.”

A cikin jawabin ta na tsawon mintuna 10 Kirchner mai shekaru 54 ta yi ta ba da misali da nasarorin da mijinta kuma shugaban kasa mai ci a yanzu wato Nestor Kirchner ya samu. A ranar 5 ga watan desamba zai sauka daga wannan mukami.

3. O-Ton Kirchner:

“Muna godiya da gagarumin aikin da gwamnatin shugaba Kirchner ta yi. Sahihan matakai da ya dauka da kuma watakila kurakuran da ya tabka sun nunar a fili yadda ya ke kaunar kasarsa. Mun gode kwarai kwarai da gaske.”

Yawan kuri´u na sama da kashi 40 cikin 100 da ta samu Chritina Kirchner ta yiwa babbar mai kalubalantarta kuma ´yar takarar jam´iyar kawance ta Coalition Civica, Elisa Carrio kintinkau. Sauran maza ´yan takara 12 ko kadan ba su kai labari ba. Idan aka hada yawan kuri´un da Christina da kuma Elisa suka samu to za´a ga cewa wannan shine karon farko a taerihin Argentina da mata suka samu kashi 2 cikin 3 na kuri´un da aka kada a wani zabe. Graciela Römer masaniya a alámuran zabe ta yi bayani tana mai cewa.

4. O-Ton Römer:

“Matan sun taka rawar gani ba wai don sun nesanta kansu daga tsoffin jam´iyun ba a´a ana daukarsu a matsayin mafiya iya rikon amana fiye da tsofaffin ´yan siyasa.”