Bush ya ce shi ya ba da umarnin yiwa Amirkawa leken asiri

Shugaban Amirka GWB ya amsa cewar shi ya ba da wani umarni na sirri bayan hare haren ta´adancin 11 ga watan satumban shekara ta 2001, wanda ya ba damar sauraron hirarrakin ´yan kasar ba tare da izinin kotu ba. A cikin jawabin sa na mako mako da yake yiwa Amirkawa ta radiyo, Bush ya ce daukar wannan mataki yana da muhimmanci don kare al´umar kasar ta Amirka daga ayyukan ´yan ta´adda. Da farko dai jaridar New York Times ta ba da labarin wannan umarni da shugaban ya bayar. A jiya juma´a gwamnatin shugaba Bush ta fuskanci babban koma-baya bayan da majalisar dattawa ta ki amincewa da sabunta dokar tabbatar da kishin kasa, wadda ta kasance kashin bayan yaki da ta´addanci da shugaban ya kaddamar. A daura da haka ´yan majalisar sun kara matsa kaimi ne a bukatunsu na inganta dokokin tsaron lafiyar jama´a.