1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Labarai

Atiku Abubakar ya koma Nijeriya bayan hutu na wata daya

Mataimakin shugaban Tarayyar Nijeriya Alhaji Atiku Abukakar wanda a cikin watannin bayan nan ke fama da rashin jituwa da shugaba Olusegun Obasanjo, ya koma Nijeriya bayan wani hutu na wata daya a kasar Amirka. Da farko an yi ta yada jitajitar cewa Atiku ba zai ma koma Nijeriyar ba. A yau da rana mataimakin shugaban kasar ya sauka filin jirgin sama na babban birnin tarayya Abuja a cikin wani jirgin sama da ya chata, kuma kai tsaye daga nan ya wuce gidansa na gwamnati. ´Yan sanda sun hana da yawa daga cikin magoya bayansa shiga harabar filin jirgin saman don tarbarsa. Hakazalika an kuma hana manema labarai da wasu manyan jami´an gwamnati zantawa da Atiku Abubakar a lokacin da ya isa.