Aski ya kai gaban goshi a taron kolin kungiyar ciniki ta duniya

Kungiyar cinikaiya ta duniya WTO zata soke dukkan tallafin da ake ba wa kayan albarkatun gona da ake fitarwa zuwa ketare. Hakan dai na kunshe a cikin daftarin sanarwar bayan taron kolin da kungiyar ke yi a Hongkong. Hakazalika kungiyar ta yi wani tanadin taimako na musamman ga kasashe matalauta. Mahalarta taron su kimanin 149 zasu ci-gaba da tattaunawa akan daftarin sanarwar bayan taron har zuwa gobe lahadi. A yau ma dai an fuskanci mummunar zanga-zanga ta masu adawa da hadakar manufofin cinikaiya na duniya a gaban zauren taron. Musamman manoman kasar KTK dauke da sanduna sun yi arangama da ´yan sandan kwantar da tarzoma.