An yi tir da farmakin da jiragen saman yakin Amirka suka auna kan Zawahiri
January 14, 2006Dubban wasu ´yan kabila a kasar Pakisan sun gudanar da zanga-zangar yin Allah wadai da wani farmaki da jiragen saman yakin Amirka suka kai, inda suka auna mataimakin shugaban kungiyar al-Qaida. Farmakin dai wanda aka kai a kusa da kan iyakar Pakistan da Afghanistan ya yi sanadiyar mutuwar mutane 18. Wadanda suka shaida abin da ya faru sun ce mutane kimanin dubu 5 suka yi taron gangami a wani filin wasa dake yankin Bajur, inda aka kai harin na jiya juma´a. A halin da ake ciki jami´an Pakistan na gudanar da bincike don gano ko shin an halaka na hannun damar Osama Bin Laden wato Ayman al-Zawahiri a farmakin na jiya. Kafofin yada labarun Amirka sun rawaito wasu jami´an leken asiri na cewa an auna wannan hari ne akan al-Zawahiri. To amma mazauna yankin sun ce dukkan wadanda aka kashe a harin ´yan kabilar yankin ne kuma mata da kananan yara na daga cikin wadanda suka rasa rayukansu.