Ana binciken dan jaridar Rasha da ya mutu a Kiev

Dan jaridan mai suna Arkadi Babchenko ya tsere daga kasarsa ta asali zuwa Ukraine a sanadiyar barazanar da ya ke fuskanta don sukar gwamnatin Kremlin kan rawar da Rashan ke takawa a rikicin gabashin kasar ta Ukraine.

Babchenko ya rasu ne a ranar Talata a sanadiyar raunin da ya samu daga harbin bindiga bayan da wasu da ba a san ko su waye ba suka bude masa wuta. Ana dai ci gaba da gudanar da bincike don gano mutanen.