An kammala kada kuri'a a zaben kasar Zambiya cikin lumana

A kasar Zambiya an rufe rumfunan zabe bayan zaben shugaban kasa da na 'yan majalisar dokoki da aka gudanar a wannan Alhamis. 'Yan kasar sun yi dogayen layuka a tashoshin zaben na gama gari, inda masu aiko da rahotanni suka ce komai ya tafi salin alim, duk da tashe-tashen hankulan da aka fuskanta lokacin yakin neman zabe. Sai dai jami'ai na fargabar barkewar wani tashin hankali bayan kawo karshen zaben, ko kuma bayan an sanar da sakamakon karshe a zaben inda ake kankankan tsakanin manyan 'yan takarar neman shugabancin kasar wato shugaba mai ci Edgar Lungu da abokin hamaiya kuma dan kasuwa Hakainde Hichilema. Shugaban tawagar sa ido ta kungiyar Tarayyar Afirka kuma tsohon shugaban Najeriya Goodluck Jonathan ya ce ya yi murna da yadda abubuwa suka gudana kawo yanzu.