ሀዘን ያጠላበት ኢሬቻ በሰሜን አሜሪካ፤

በዚሁም መሠረት በሀገር ዉስጥ እና በዉጭ የሚገኙ ኤምባሲዎች እንዲሁም በኢትዮጵያ ሰንደቅ ዓላማ ይዘዉ በሚንቀሳቀሱ መርከቦች ሠንደቅ ዓላማ ዝቅ ብሎ እንዲዉለበለብ መታዘዙን ወኪላችን ዮሐንስ ገብረ እግዚአብሔር በላከዉ ዘገባ ጠቅሷል። ብሔራዊ የሀዘን ቀኑ ለሦስት ቀናት የሚዘልቅ ነዉ።  ከሀገር ዉስጥ የሚወጡ የተለያዩ ዘገባዎች ከ50 በላይ ሰዎች ህይወት ከጠፋበት ከትናንቱ ክስተት ማግስት ዛሬም በተለያዩ የኦሮሚያ ከተሞች ተቃዉሞ መቀጠሉን ያመለክታሉ። ትናንት ማምሻዉን ከአዲስ አበባ 45 ኪሎ ሜትር ርቀት ላይ በምትገኘዉ ቢሾፍቱ ከተማ እና በአምቦ በፀጥታ ኃይሎች እና በተቃዉሞ እንቅስቃሴ አድራጊዎች መካከል የተነሳዉ ግጭት ዛሬም መቀጠሉን እማኞችን እና የመንግሥት ባለስልጣናትን የጠቀሱት ዘገባዎች ዘርዝረዋል።

በተያያዘ ዜና በየዓመቱ የክረምቱን ማብቃት ተከትሎ የኦሮሞ ብሔር ፈጣሪዉን የሚያመሰግንበት ኢሬቻ በመባል የሚታወቀዉ በዓል ካናዳ እና ዩናይትድ ስቴትስ ዉስጥ ትናንት ተከብሮ መዋሉ ተሰምቷል። ሀገር ዉስጥ በብዙ ሚሊየን በሚቆጠሩ ሰዎች ደምቆ የሚከበረዉ በዓል በዉጭዉ ዓለምም ባህልና ትዉፊቱን ጠብቆ ለዓመታት ሲከበር ቆይቷል። የዴሞክራሲያዊዉ የገዳ ሥርዓት አንዱ መገለጫ የሆነዉ የኢሬቻ በዓልን ዘንድሮ ያከበሩት በሀዘን መሆኑንም ለዶቼ ቬለ አስተያየታቸዉን የሰጡት ወገኖች ገልጸዋል። 

 

ዮሐንስ ገብረ እግዚአብሔር/መክብብ ሸዋ

ሸዋዬ ለገሠ

አዜብ ታደሰ