1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

አውሮጳ/ጀርመን

7ኛው የዶይቸ ቬለ ዓለም አቀፍ የመገናኛ ብዙኃን መድረክ

ዶይቸ ቬለ በየዓመቱ የሚያዘጋጀው ዓለምአቀፍየመገናኛብዙኃንመድረክዛሬ ተከፈተ። በዚህ ሶስት ቀናት በሚቆየው መድረክ ከተለያዩ ሀገራት የመጡ እስከ 2000 የሚደርሱ ተካፋዮች ይሳተፋሉ።

ይህ 7ኛው የዶይቸ ቬለ ዓለም አቀፍ የመገናኛ ብዙኃን መድረክ ነው። በአዲሱ የጀርመን ስራ አስኪያጅ ፔተር ሊምቡርግ የተከፈተው መድረክ ዘንድሮ« ከመረጃ አቅርቦት እስከ ተሳትፎ- የመገናኛ ብዙኃን ተግዳሮት» የሚል ርዕስ ይዟል። «በአሁኑ ሰዓት በዮክሬይን እየተካሄደ ያለውን ጦርነት በተጨባጭ ሁኔታ የሰው ህይወት የሚጠፋበት ድርጊት መሆኑ ቀርቶ የመረጃ ጦርነት ብንለው ይቀላል »ያሉት የሰሜን አትላንቲክ መከላከያ ቃል ኪዳን ድርጅት ምክትል ዋና ፀሀፊ ጃሚ ሺአ ናቸው። የደህንነት አስከባሪው ምሁር በዘንድሮው የዓለም አቀፍ የመገናኛ ብዙኃን መድረክ ተገኝተው ንግግር ከሚያደርጉ የክብር እንግዶች አንዱ ናቸው። እንደ ብሪታኒያዊው አመለካከት ወቅታዊ ቀውስ በሚስተዋልባቸው ዮክሬይን፣ ቱርክ እና በጸደይ አብዮት ሀገራት ኢንተርኔት ግጭቱ ያለውን ቅርፅ እንዲቀይር ብርቱ ሚና ተጫውቷል። ስለሆነም ኢንተርኔት ለመገናኛ ብዙኃን ምን አይነት ሚና ይጫወታል? የሚለው ሌላው የዚህ መድረክ ትኩረት ነው። ከሺአ ሌላ የኤድዋርድ ስኖደን በቅርብ አማካሪነት የምትታወቀው የብሪታንያ ጋዜጠኛ ሳራ ሀሪስ እና ሌሎችም በዚህ የዓለም አቀፍ የመረጃ ልውውጥ እንዴት የሰው ልጅን ደህንነት ማስከበር እና ጥቃትን መከላከል እንደሚቻል ይወያያሉ።

GMF Global Media Forum 2014 Intendant Peter Limbourg

የዶይቸ ቬለ ዋና ስራ አስኪያጅ ሊምቡርግ የመክፈቻ ንግግር

የዶይቸ ቬለ ዋና ስራ አስኪያጅ ሊምቡርግ ከጠዋቱ አራት ሰዓት ላይ የመድረኩ የክብር እንግዶችን እና ተሳታፊዎችን እንኳን ደህና መጣችሁ ካሉ በኋላ ወዲያው ወደ መወያያ ርዕሱ ነው የገቡት።« ዛሬ ኢንተርኔት አማራጭ መረጃ ማግኛ እና መሳተፊያ መድረክ ነው። ህይወታችንን የቀየረ፣ የበለጠ ቀለም እና ሀብት የሰጠ ግኝት ነው። ኢንተርኔት በዓለም ዙሪያ ያለው እውቅና የእርስ በዕርስ ግንኙነትን አስፋፍቶ መረጃን እንዴት እንደምንፈጥር እና እንደምናገኝ ወስኗል። የአጥናፋዊ ትስስር የጀርባ አጥንት ሆኗል።ከዚህም ሌላ የእድገት፣ ትምህርት እና ለበለጠ ማህበራዊ ግንኙነቶች እድል ፈጥሯል። ኢንተርኔትን መፍራት አይገባንም ይልቁንስ ያለውን አቅም ዓለምን በበጎ ለመቀየር ልንጠቀምበት ይገባል።»

ዛሬ በተከፈተው መድረክ በክብር እንግዳነት ተገኝተው ንግግር ካደረጉት አንዱ ባሴም ዩሴፍ ነው። ሀሳብን በምፀት በመግለጽ የሚታወቀው ግብፃዊው ሀኪም በተለይ በዓረቡ ሀገራት ይተላለፍ በነበረው የቴሌቪዥን ፕሮግራሙ ይታወቃል። ዩሴፍ ባደረገው ንግግር ፍርሃት ለምን ለዲሞክራሲና ነፃነት ትልቅ እንቅፋት እንደሆነ እንዲህ ነበር የገለፀው።

GMF Global Media Forum 2014 Auftritt Bassem Youssef

ሀሳብን በምፀት በመግለጽ የሚታወቀው ግብፃዊ ባሴም ዩሴፍ

« ካሉ የጦር መሳሪያዎች ሁሉ ስኬታማው ፍርሃት ነው። ፍርሃት አንገት ያስደፋናል፣ ፍርሃት ሰዎች ያላቸውን ጥሩ ግምገማ ከመስጠት ይቆጥባቸዋል። ፍርሃት የሰው ልጅ ትልቅ ስጦታ የሆነውን ስብዕናን ይነጥቃል። »ዩሴም የሚናገረው የራሱን ተሞክሮ ተመርኩዞ ነው። የቀድሞው ፕሬዚዳንት ሞሀመድ ሙርሲንና የእስልምና ሀይማኖትን አንቋሿል ተብሎ ከግብፅ መንግሥት ወቀሳ ደርሶበት ያውቃል። ምንም እንኳን ዩሴፍ ይህንን ቢቋቋመውም የዛሬ አንድ ወር ገደማ የቴሌቪዥን ዝግጅቱ እንዲቋረጥ ተደርጓል። ዩሴፍ እገዳውን በተለመደው ምፀት ነው የገለፀው።« «በግብፅ ታይቶ የማይታወቀውን አይነት ነፃነት እያየን ነው፤ይህን ማየት የማይችል ካለ ምላሱ ይቆረጥ ሲል።» ስለሆነም አለ ዩሴፍ ዛሬ ባደረገው ንግግር ይህንን ፍርሃት ለመወጣት ኢንተርኔት ትልቅ ሚና ይጫወታል። « ምንም እንኳን የቴሌቭዥን ዝግጅቴ ቢቋረጥም ሀሳቦቼ በኢንተርኔት አሁንም እየኖሩ ነው ብሏል።

ኢንተርኔት የመወደሱንም ያህል ከኢንተርኔት ጋር ተያይዘው የሚመጡ ወንጀሎች ሳይነሱ አላለፉም። በኢንተርኔት የሚደረጉ ስለላዎች እና ሌሎች ወንጀሎች ከኢኮኖሚያዊ እና ማህበራዊ ባለፈ ለመገናኛ ብዙኃንም ተግዳሮት ሆኗል ብለዋል የዶይቸ ቬለ ስራ አስኪያጅ። የዶይቸ ቬለ ዓለምአቀፉየመገናኛብዙኃንመድረክ ነገም ይቀጥላል። በ dw.de ወይም dw.com ላይ በጠረቤዛ ዙሪያ የሚደረጉ ውይይቶችን እና የክብር እንግዶችን ንግግር በቀጥታ መከታተል ይቻላል።

ልደት አበበ

ተክሌ የኃላ

Audios and videos on the topic