1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

አውሮጳ እና ጀርመን

ግሪክ፥ አዲሱ የቁጠባ እቅዷ አወያየ

ግሪክ ተጨማሪ ብድር እንድታገኝ ያቀረበችው አዲስ የቁጠባ ዕቅድ ላይ ለመደራደር የዩሮ ቡድን የገንዘብ ሚኒስትሮች እንዲሁም አበዳሪ መንግሥታትና ተቋማት ዛሬ ቤልጄም-ብራስልስ ተሰብስበው መክረዋል። ከድርድሩ በፊት የጀርመኑ የገንዘብ ሚኒስትር ዎልፍጋንግ ሾይብለ ግሪክ ለ3ኛ ዙር ያቀረበችው የቁጠባ እቅድ አጥጋቢ አይደለም ሲሉ ተናግረዋል።

የግሪኩ ጠቅላይ ሚኒስትር አሌክሲስ ሲፕራስ ዛሬ አበዳሪዎቻቸው የሚወያዩነትን የቁጠባ እና የተሐድሶ መርሐ-ግብር ዓርብ ሌሊት የግሪክ የህዝብ ተወካዮች ምክር ቤት አፅድቆታል። ከ300 የምክር ቤት አባላቱ 251ዱ አዲሱን መርሐ ግብር ሲደግፉ፤ 32ቱ ደግሞ ተቃውመዋል። 8 ደግሞ ድምፀ- ተአቅቦ አድርገዋል። ተዐቅቦ ካደረጉት መካከል የገዢው የሲፕራስ «ሲሪዛ» ፓርቲ አባላት ይገኙበታል። ጠቅላይ ሚኒስትር ሲፕራስ አዲሱን የቁጠባ እና የተሐድሶ መርሐ-ግብር ፓርላማቸው ገና ሳያፀድቀው ሐሙስ ምሽት ለዩሮ ሸርፍ ተጠቃሚ ሀገሮች ልከው ነበር።

የዩሮ ዞን አባል ሃገራት 19 ሚንስትሮች እና ሌሎች ባለሥልጣናት ዛሬ ባኪያሄዱት ስብሰባ ግሪክ ያቀረበችው አዲስ የቁጠባ ዕቅድ «እጅግ አጣብቂኝ» ውስጥ የሚከት መሆኑን አውስተዋል። ግሪክ ለቀሪዎቹ 18 የዩሮ ሸርፍ ተጠቃሚ ሃገራት አዲስ ያለችው ዕቅድ ብታቀርብም ሚንስትሮቹ ቀላል መፍትኄ ማግኘት እንደማይቻል ጠቁመዋል።

በግሪክ የተካሄደዉ የአበዳሪ ድርጅቶችን ቅድመ ሁኔታ የመቀበል ያለመቀበል ሕዝበ ዉሳኔ ከስልሳ ከመቶ በላይ የሚሆነዉ የግሪክ ሕዝብ ቅድመ ሁኔታዉን መቃወሙ ከታወቀ በኋላ በግሪክ፤ በአበዳሪዎቿና በዩሮ ተጠቃሚ ሃገራት መካከል ያለዉ ግንኙነት አጣብቂኝ ዉስጥ ገብቷል። በአሁኑ ወቅት ግሪክ ዉስጥ ባንኮች ተዘግተዋል። የኤኮኖሚ እንቅስቃሴዉም ቆሟል። ይህ ችግሯ ባፋጣኝ ካልተፈታም ግሪክ ከዩሮ ልትወጣ ልትገደድ፤ ሕዝቡም ለከፋ ችግር ሊጋለጥ ይችላል የሚል ስጋት አለ።

ግሪክን ከውድቀት ለመታደግ የግሪክ መንግሥት ለውይይት ያቀረበው አዲስ የቁጠባ እና የተሐድሶ መርሐ-ግብር ለተግባራዊነቱ 89 ቢሊዮን ዶላር ግድም ወጪ እንደሚያስፈልገው ተጠቅሷል። ግሪክ አዲስ ያቀረበችው ዕቅድ በቀላሉ ተቀባይነት የሚያገኝ አይመስልም። የጀርመኑ የገንዘብ ሚኒስትር ዎልፍጋንግ ሾይብለ «በአውሮጳ ኅብረት ውል መሰረት የዕዳ ስረዛ ማድረግ አይቻልም።» ሲሉ አስጠንቅቀዋል።

ልደት አበበ

ማንተጋፍቶት ስለሺ