ዜና | DW
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

ዜና | 19.06.2018 | 00:00

የተለያዩ-ጠቅላይ ሚንስትሩ ደቡብ ኢትዮጵያን ጎበኙ

የኢትዮጵያ ጠቅላይ ሚንስትር አብይ አሕመድ በደቡብ ኢትዮጵያ በተለያዩ ከተሞች የተቀሰቀሰዉን ግጭት እና ግድያ ለማስቆም ከየአካባቢዉ ነዋሪዎች እና ባለሥልጣናት ጋር እየተወያዩ ነዉ። ጠቅላይ ሚንስትሩ ዛሬ ከቀትር በፊት አዋሳ ዉስጥ ከከተማዋ ነዋሪዎች፤ ከሲዳማ ብሔረሰብ ተወካዮች እና ከመንግሥት ባለሥልጣናት ጋር ተወያይተዋል። የተለያዩ የሕብረተሰብ ክፍሎች ያላቸዉን ቅሬታ እና ጥያቄ በሕግ አግባብ በሰላማዊ መንገድ ማቅረብ እየቻሉ የሌላ ጎሳ አባላትን መግደል፤ማጥቃት እና ሐብት ንብረታቸዉን ማጥፋት ሕገ-ወጥ እንደሆነ ጠቅላይ ሚንስትሩ አስገንዝበዋል።አጥፊዎች በሕግ እንደሚጠየቁም አስታዉቀዋል።የሐዋሳ ነዋሪ ዶክተር ዳንኤል በኃይሉ እንደገለፁት ሐዋሳ፤ ወላይታ ሶዶ እና ወልቂጤ ዉስጥ ተቀስቅሶ የነበረዉ ግጭት ዛሬ ቀንሶ ነዉ-የዋለዉ።ለመንግሥት ቅርበት ያለዉ ፋና ብሮድካስት እንደዘገበዉ ጠቅላይ ሚንስትሩ ዛሬ ከቀትር በኋላ ወላይታ ሶዶ፤ ነገ ደግሞ ወልቂጤ ዉስጥ ተመሳሳይ ዉይይት ያደርጋሉ።ባለፈዉ ሳምንት ከማክሰኞ ጀምሮ አዋሳ፤ ወላይታ ሶዶ እና ወልቂጤ ከተሞች በተቀሰቀሰ የጎሳ ግጭት ከ15 እስከ 20 የሚደርሱ ሰዎች መገደላቸዉ ተዘግቧል።

አዲስ አበባ-ለጠቅላይ ሚንስትር ዓብይ የድጋፍ ሠልፍ ተጠራ

የኢትዮጵያ ጠቅላይ ሚንስትር ዓብይ አሕመድ እስካሁን ላከናወኗቸዉ ምግባራት ምሥጋና ለማቅረብ እና መርሐቸዉን ለመደገፍ ያለመ የአደባባይ ሰልፍ የፊታችን ቅዳሜ አዲስ አበባ ዉስጥ ሊደረግ ነዉ።P የሠልፉ አደራጆች ዛሬ በሰጡት ጋዜጣዊ መግለጫ እንዳስታወቁት የድጋፍ ሠልፉ ያንድ ወገን የፖለቲካ፤ የጎሳም ሆነ የኃይማኖት አስተሳሰብ አይፀባረቅበትም። የሰልፉ አደራጆች እራሳቸዉ ሠልፉን የጠሩት በራሳቸዉ ተነሳሽነት እንደሆነ አስታዉቀዋል። ሥድስት አባላት ያሉትን አዘጋጅ ኮሚቴ የሚመሩት አቶ ክንፈ ሚካኤል (አበበ ቀስቶ በቅፅል ስማቸዉ) እንዳሉት የሠልፉ ዓላማ ጠቅላይ ሚንስትር ዓብይ እስካሁን ለሰሩት ለማመስገን፤ ለወደፊቱ ደግሞ የበለጠ እንዲሰሩ ለማበረታት ነዉ።ዘንድሮ መጋቢት 24 የጠቅላይ ሚንስትርነቱን ሥልጣን የያዙት ዶክተር ዓብይ አሕመድ የኢትዮጵያን የ27 ዘመን ፖለቲካዊ እና ምጣኔ ሐብታዊ እዉነታ ለመለወጥ እየጣሩ ነዉ።ታዛቢዎች እንደሚሉት ዶክተር አብይ እስካሁን የወሰዷቸዉ እርምጃዎች፤ ያሳለፏቸዉ ዉሳኔዎች እና የገቡት ቃል ከአብዛኛዉ ሕዝብ ድጋፍ እና አድናቆት እትርፎላቸዋል።

አዲስ አበባ-የደቡብ ሱዳን ተፋላሚዎች ድርድር

የደቡብ ሱዳን ፕሬዝደንት ሳልቫ ኪር እና የሐገሪቱ ዋነኛ አማፂ ቡድን መሪ ሪየክ ማቻር ነገ አዲስ አበባ ዉስጥ ፊት ለፊት ተገናኝተዉ ሊነጋገሩ ነዉ። የኢትዮጵያ ዉጪ ጉዳይ ሚንስቴር እንዳስታወቀዉ የሁለቱ የተፋላሚ ኃይላት መሪዎች ንግግር አምስት ዓመት ያስቆጠረዉ ጦርነት በሰላም የሚፈታበትን ሥልት በማፈላለግ ላይ የሚያተኩር ነዉ። የፕሬዝደንት ኪር መንግሥት ጦር እና የቀድሞ ምክትላቸዉ የማቻር አማፂ ኃይላት በገጠሙት ዉጊያ በአስር ሺሕ የሚቆጠር ሰዉ ተገድሏል።በሚሊዮን የሚቆጠር ተሰድዷል ወይም ተፈናቅሏል። የጎሳ መልክ እና ባሕሪ የተላበሰዉን ጦርነት ለማስቆም በምሥራቅ አፍሪቃ የልማት በይነ መንግስታት ባለስልጣን (ኢጋድ) ሸምጋይነት በተደጋጋሚ የተደረገዉ ድርድር እና ሥምምነት እስካሁን ለዉጤት አልበቃም። ሮይተር የጠቀሰዉ የኢትዮጵያ ዉጪ ጉዳይ ሚንስቴር መግለጫ እንደሚለዉ የነገዉ ድርድር በፕሬዝደንት ሳልቫ ኪር እና በቀድሞዉ ምክትላቸዉ መካከል ያለዉን የሰፋ ልዩነት ለማጥበብ የኢትዮጵያ ጠቅላይ ሚንስትር አብይ አሕመድ የቀየሱት ሥልት አካል ነዉ።

ሰነዓ-የሁዴይዳን ለመያዝ ዉጊያዉ ቀጥሏል

የየመንን ሥልታዊ የወደብ ከተማ ሁዴይዳን ለመያዝ እና ላለማስያዝ የሚደረገዉ ዉጊያ ዛሬም ለሁለተኛ ሳምንት እንደቀጠለ ነዉ። የስደተኛዉ የየመን መንግስት ወታደሮች እና ሳዑዲ አረቢያ መራሹ የአረብ ሐገራት ጦር የከተማይቱን አዉሮፕላን ማረፊያ ከሁቲ አማፂያን እጅ ለማስለቀቅ ካለፈዉ ሳምንት ጀምሮ ካየር እና ከምድር መጠነ-ሰፊ ጥቃት ከፍተዋል። ይሁንና አጥቂዉ ጦር ከአዉሮፕላን ድብደባ በስተቀር፤ እግረኛዉ ጦር የሁቲ አነጣጥሮ ተኳሾች ጥቃት ተቋቁሞ ወደ አዉሮፕላን ማረፊያዉ መቃረብ አልቻለም። የተባበሪዎቹ ሐገራት ጦር አዛዦች እንዳስታወቁት ከሁቲ አነጣጥሮ ተኳሾች በተጨማሪ አዉሮፕላን ማረፊያዉ ዙሪያ በፈንጂ ሥለታጠረ ሰብሮ መግባት አልቻሉም። የተባባባሪዉ ሐገር የጦር ጄቶች የአዉሮፕላን ማረፊያዉ መንደርደሪያዎች፤ መቆሚያዎች እና ሕንፃዎች አዉድመዉታል። በአካባቢዉ ይኖሩ የነበሩ ከ5,200 በላይ ቤተሰቦች ወደ ሌላ ሥፍራ ተሰደዋል። የሳዑዲ አረቢያ የጦር ጄቶች ዛሬ በጣሉት ቦምብ ቢያንስ ስድስት ሰላማዊ ሰዎች ገድለዋል።

ዤኔቭ-የዓለም ስደተኞች ቀን

ጦርነት፤ፖለቲካዊ ቀዉስ፤ በደል እና ረሐብ ከቤት ንብረቱ ያፈናቀለ እና ያሰደደዉ የዓለም ሕዝብ ቁጥር ከ68.5 ሚሊዮን መብለጡን የተባበሩት መንግሥታት የስደተኞች መርጃ ከፍተኛ ኮሚሽነር (UNHCR) አስታወቀ።ዓለም አቀፉ የስደተኞች መርጃ ድርጅት እንደሚለዉ በየአካባቢዉ የነበሩ ዉጊያ እና ቀዉሶች ባለመቆማቸዉ እና አዳዲስ ቀዉሶች በመቀስቀሳቸዉ የተፈናቃዩ እና ስደተኛዉ ቁጥር እየጨመረ ነዉ።የድርጅቱ ኃላፊ ፊሊፖ ግራንዴ ነገ የሚታሰበዉን የዓለም ስደተኞች ቀን ምክንያት በማድረግ እንደተናገሩት ማብቂያ ያጣዉ ጦርነት፤ ግጭት፤በሰላማዊ ሰዎች ላይ የሚፈፀመዉ ግፍ እና በደል እስካልቆመ ድረስ የስደተኛዉ ቁጥር መናሩ አይቀርም።«ዓለም አቀፉ ቁጥር አሁንም በጥቂት ሚሊዮኖች ጨምሯል።ባሁኑ ወቅት በመላዉ ዓለም ከ68.5 ሚሊዮን የሚበልጥ ሕዝብ ስደተኛ ወይም ተፈናቃይ ነዉ። የስደተኛዉ ቁጥር በየጊዜዉ የሚጨምረዉ የተራዘሙ ግጭቶች፤ለግጭቶች መፍትሔ አለመደረጉ፤ ግጭት የሚካሔድባቸዉ ሐገራት ሰላማዊ ዜጎች እንዲሰደዱ የሚደረግባቸዉ ጫና በማየሉ እና በመቀጠሉ ነዉ። አዳዳዲስ ግጭቶች እና በሮሒንጂያ ሙስሎሞች ላይ የተፈፀመዉ ዓይነት በደሎች መድረሳቸዉም የስደተኛ እና የተፈናቃዩን ቁጥር ጨምሮታል። የሮሒንጂያዉ ቀዉስ ለቁጥሩ መጨመር ዋናዉ ነዉ።»ግራንዴ አክለዉ እንዳሉት ከ68,5 ሚሊዮኑ ስደተኛ እና ተፈናቃይ ከሰባ በመቶ የሚበልጠዉ የሰፈረዉ በአስር ደሐ እና መካከለኛ ገቢ ባላቸዉ ሐገራት ነዉ።የዓለምን አብዛኛ ሐብት የሚቆጣጠሩት ጥቂት ሐብታም ሐገራት የሚያስተናግዱት ስደተኛ ቁጥር ኢምንት ነዉ።የዩናይትድ ስቴትስ እና የአዉሮጳ ሕብረት አባል ሐገራት መንግሥታት ስደተኛ ወደ ሐገራቸዉ እንዳይገባ እያገዱ ነዉ።

በርሊን-ጀርመንና ፈረንሳይ ተስማሙ

የጀርመን መራሒተ መንግሥት አንጌላ ሜርክል እና የፈረንሳዩ ፕሬዝደንት ኢማኑኤል ማክሮ የዩሮ ተጠቃሚ ሐገራት የጋራ በጀት እንዲኖራቸዉ ተስማሙ። ሁለቱ መሪዎች እንዳሉት ዛሬ በርሊን-ጀርመን ዉስጥ ያደረጉት ሥምምነት የ19ኙን የዩሮ ሸርፍ ተጠቃሚ ሐገራትን ምጣኔ ሐብት ለማቀራረብ እና ለማሳደግ ይረዳል። ታዛቢዎች እንደሚሉት የበጀቱ ጉዳይ የዩሮ ሸረፍ ተጠቃሚ ሐገራትን ምጣኔ-ሐብት ለማሻሻል ከተነደፈዉ ሥልት ሁሉ ዋነኛዉ ነዉ። ወይዘሮ ሜርክል የበጀት ስምምነቱን በዩሮ ሸርፍ አሰራር ዉስጥ አዲስ ምዕራፍ ብለዉታል።

ሳራንስክ-የዓለም እግር ኳስ ግጥሚያ

ሩሲያ በተያዘዉ የዓለም እግር ኳስ የዋንጫ ግጥሚያ ዛሬ የጃፓን ብሔራዊ ቡድን የኮሎምቢያ ባላጋራዉን 2-ለአንድ አሸንፏል። በዓለም እግር ኳስ የዋንጫ ግጥሚያ የእስያ የእግር ኳስ ቡድን፤ የደቡብ አሜሪካ ቡድንን ሲያሽንፍ የዛሬዉ የመጀመሪያዉ ነዉ። ሩሲያ በምታስተናግደዉ በዘንድሮዉ ግጥሚያ የመጀመሪያዉ ቀይ ካርድ ተሰጥቷልም። የኮሎሚቢያዉ የመሐል ተጨዋች ካርሎስ ሳንቼዝ ጨዋታዉ በተጀመረ በሰወስተኛዉ ደቂቃ ጃፓኖች የመቷትን ኳስ በእጁ በመያዙ ከሜዳ ተባርሯል። ሳንቼዝ ግጥሚያ በተጀመረ ባጭር ጊዜ ዉስጥ ከሜዳ በመባረር በዓለም እግር ኳስ የዋንጫ ግጥሚያ ታሪክ ሁለተኛዉ ነዉ።የመጀመሪያዉ የዩራጓዩ ሆሴ ባቲስታ ነበር።እንደ ጎርጎሪያኑ አቆጣጠር በ1986 የዩራጓይ ቡድን ከስኮትላንድ ባላጋራዉ ጋር ግጥሚያ በጀመረ በ55ኛዉ ሴኮንድ አጥፍቶ በቀይ ካርድ ከሜዳ ተበራሯል።ከቡድን ኤች ሴኔጋል ፖላንድን 2 ለ 1 አሸንፋለች።በሩሲያዉ ዉድድር ከሚካፈሉት ከአምስቱ የአፍሪቃ ቡድናት እስካሁን የሴኔጋል ቡድን ተጋጣሚዉን ያሸነፈ የመጀመሪያዉ የአፍሪቃ ቡድን ነዉ።NM