1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

ዜና | 02.07.2015 | 16:58

ማይዱግሪ 97 ሰዎች ተገደሉ

ሰሜን ምስራቅ ናይጀሪያ ውስጥ በናይጀሪያው ፅንፈኛ ቡድን ቦኮሃራም ሚሊሽያዎች  በተፈፀመ ጥቃት ቢያንስ 97 ሰዎች መገደላቸው ተሰማ ። ሰዎቹ የተገደሉት ትናንት ምሽት የቦርኖ ክፍለ ግዛት ዋና ከተማ በሆነችው በማይዱግሪ ከተማ ውስጥ የሚገኘውን ኩካዋ የተባለው መንደር ከ50 በላይ የሚሆኑ ታጣቂዎች ከወረሩ በኋላ ነው ።ጥቃቱ የደረሰው ሙስሊሞች ፆም በሚፈቱቡት ሰዓት በመኖሪያ ቤቶችና በመስጊዶች ውስጥ እንደነበረ ተዘግቧል ።

ባማኮ 6 ሰላም አስከባሪዎች ተገደሉ

ሰሜን ማሊ ውስጥ ሚሊሽያዎች እንደ ጣሉት በተገመተ ጥቃት 6 የተባበሩት መንግሥታት ድርጅት ሰላም አስከባሪዎች ተገደሉ። የፈረንሳይ ዜና አገልግሎት እንደዘገበዉ ሰላም አስከባሪዎቹ  የተገደሉት ለጥበቃ በተሰማሩበት ቲምቡክቱና ጋውንዳም በተባለው ከተማ መካከል በሚገኝ ስፍራ ላይ ወታደራዊ አጀባቸው ጥቃት ከተፈተበት በኋላ ነው። በዚሁ ከቲምቡክቱ በስተደቡብ 45 ኪሎ ሜትር ርቀት ላይ በደረሰው አደጋ ከሞቱት በተጨማሪ 5 ሰላም አስከባሪዎች መቁሰላቸውም ተነግሯል። 2 መኪናዎችም የወደሙበትን ጥቃት ማን እንዳደረሰ በግልፅ አልታወቀም። ሆኖም የዓይን ምስክሮች የጥቃት አድራሾቹ መኪናዎች ላይ የፅንፈኞች ባንዲራ ማየታቸውን ተናግረዋል። ሚኑስማ በሚል ምህፃር የሚጠራው የተመ ሰላም አስከባሪ ኃይል በጎርጎሮሳዊው 2013 ዓም ማሊ ከተሰማራ ወዲህ 35 ሰላም አስከባሪዎች መገደላቸውን አስታውቋል።

ሰንአ በአየር ጥቃት 8 ተገደሉ

በሳውዲ አረቢያ መራሹ የየመን የአየር ጥቃት በየመን ዋና ከተማ ሰንአ ዛሬ 8 ሰዎች መገደላቸው ተዘገበ። በጥቃቱ 10 ሰዎችም ቆስለዋል። በዛሬው ዕለት በሰሜናዊቷ በሳአዳ ክፍለ ሃገር  35 ጊዜ ያህል የአየር ጥቃት ተካሂዷል። በዚሁ ጥቃት 2 ሰዎች መገደላቸውና 15 ደግሞ መቆሰላቸው ተነግሯል። የዛሬው ጥቃት በቀድሞው የየመን ፕሬዝዳንት አሊ አብደላ ሳልህ መኖሪያ ቤት ላይም ያነጣጠረ እንደነበረ የዓይን ምስክሮች ተናግረዋል። በሳውዲ አረቢያ የሚመራው የአረብ ሃገራት ህብረት  ካለፈው መጋቢት አጋማሽ ጀምሮ በየመን በሚያካሂደው የአየር ጥቃት የሞቱት ሰዎች ቁጥር ከ2,800 በልጧል። የተመድ እንዳስታወቀው ከህዝቡ ከ21 ሚሊዮን በላይ የሚሆነው ወይም 80 በመቶው ሰብዓዊ እርዳታ እና ጥበቃ ያሻዋል። 

ቡጁምቡራ የምርጫ ውጤት እየተጠበቀ ነው

የአወዛጋቢው የብሩንዲ ምርጫ ውጤት እየተጠበቀ ነው። የብሩንዲ የምርጫ ኮሚሽን በአካባቢ ደረጃ የድምጽ ቆጠራው መጠናቀቁ  አስታውቋል፤ ሆኖም የመጨረሻው ውጤት መቼ ይፋ እንደሚሆን ግን በግልፅ አልታወቀም። ተቃዋሚዎች ያልተሳተፉበትን የሰኞውን የብሩንዲ ምርጫ በሀገሪቱ ፕሬዝዳንት በፕየር ንኩሩንዚዛ የሚመራው በምህፃሩ CNDD-FDD የተባለው ፓርቲ በአብላጫ ድምጽ ያሸንፋል ተብሎ እየተጠበቀ ነው። ሰኞ የተካሄደው የብሩንዲ ብሄራዊና አካባቢያዊ ምክር ቤት ምርጫ የተመድ እና የአፍሪቃ ህብረትን ጨምሮ በዓለም ዓቀፉ ማህበረሰብ ተወግዟል። ከትናንት ጋር ሲነፃፀር ዛሬ ዋና ከተማይቱ ብሩንዲ ተረጋግታ መዋሏ ተዘግቧል። ።ሆኖም ትናንት ለፕሬዝዳንቱ የተደረገው ጥበቃ የተጠናከረ እንደነበረ አንድ የሲቪል ማህበረሰብ አባል ተናግረዋል ።

«ፕየር ንኩሩንዚዛም ቢሆኑ አሁን ፍርሃት አድሮባቸዋል ለምሳሌ ዛሬ ንኩሩንዚዛ ስታድዮም ውስጥ ለህዝቡ ንግግር ያደረጉት በጥይት ተከላካይ መስተወት ተከልለው ነበር ።»

ትናንት ቡጁምቡራ ውስጥ የንኩሩንዚዛ ተቃዋሚዎች በሚያመዝኑበት ሲቢቶኬ በተባለው ቀበሌ ከፖሊስ ጋር በተካሄደ ግጭት አንድ ፖሊስን ጨምሮ ቢያንስ 6 ሰዎች ተገድለዋል። ፖሊስ፣ የተገደሉት አምስቱ የታጣቂ ቡድን አባላት ናቸው ሲል በአካባቢው የነበረ የፈረንሳይ ዜና አገልግሎት ጋዜጠኛ ግን ሰላማዊ ሰዎች መሆናቸውን ዘግቧል። ከመካከላቸው አንድ የ60 ዓመት አዛውንትና ሁለት ወንዶች ልጆቻቸው ይገኙበታል።

ሞኖሮቭያ በኤቦላ የተያዙ ተጨማሪ ሰዎች ተገኙ

ከሁለት ወራት በፊት ከገዳዩ ከኤቦላ ተሐዋሲ ነፃ ሆናለች በተባለችው በላይቤሪያ በኤቦላ የተያዘ ሶስተኛ ሰው መገኘቱ ዛሬ ተነገረ። ባለፈው እሁድ አንድ የ17 ዓመት ወጣት በበሽታው መሞቱ ተገልጿል። ሟቹ በሽታው ጠፍቷል ከተባለ ወዲህ በበሽታው መያዙ ለመጀመሪያ ጊዜ የታወቀ የኤቦላ ታማሚ መሆኑ ነው። ሌሎች የ24 እና የ27 ዓመት ወጣቶች ተሐዋሲዉ እንደተገኘባቸው የላይቤሪያ የጤና ጥበቃ ሚኒስቴር ትናንት አስታውቋል። የጤና ጥበቃ ምክትል ሚኒስትር ቶልበርት ንየንስዋህ ሁለቱ ወጣቶች ዋና ከተማይቱ ሞንሮቭያ አጠገብ በሚገኝ የህክምና ማዕከል ውስጥ እንዲገቡ መደረጉን ተናግረዋል። ከሞተው ወጣት ጋር ንክኪ ወይም ግንኙነት የነበራቸው ሰዎችን ፍለጋም ቀጥሏል። እስካሁን ከሟቹ ጋር ንክኪ ነበራቸው የተባሉ 14 የጤና ባለሞያዎች ክትትል እየተደረገላቸው ነው።በአጠቃላይ ከሶስቱ የኤቦላ ተጠቂዎች ጋር ንክኪ ነበራቸው የተባሉ 175 ሰዎችም እየተመረመሩ ነው ።

አቴንስ የግሪክ ህዝበ ውሳኔ

የግሪክ ህዝብ በመጪው እሁድ አበዳሪዎች ያስቀመጧቸውን ቅድመ ግዴታዎች መቀበል፣ አለመቀበል ላይ የሚሰጠው ድምጽ ውጤት አንቀበልም የሚል ከሆነ ግሪክ በዩሮ ተጠቃሚ ሃገራት ማህበር ውስጥ መቀጠልዋ እንደሚያጠራጥር ተነገረ። የ18ቱ የዩሮ ተጠቃሚ ሃገራት ማህበር ሊቀመንበር የረን ዲሰልብለም ዛሬ ለሆላንድ ፓርላማ ባሰሙት ንግግር፤ የግሪክ ህዝብ አበዳሪዎች ያቀረቡትን ሃሳብ ካልተቀበለ፤ የግሪክ የአዲስ የብርድርና የእርዳታ መርሃ ግብርም ሆነ ሃገሪቱ በዩሮ ማህበር ውስጥ ልትቆይ የምትችልበት መሠረት አይኖርም ብለዋል። የሆላንድ የገንዘብ ሚኒስትርም የሆኑት ዲስብለም ህዝቡ የአበዳሪዎችን ሃሳብ ሳይቀበል ከአበዳሪዎቹ የተሻሉ መፍትሄዎችን ሊጠብቅ አይገባም ብለዋል። የዲሰልብለም ንግግር የግሪኩ ጠቅላይ ሚኒስትር አሌክሲስ ሲፕራስ ውጤቱ አንቀበልም ከሆነ አበዳሪዎች የተሻለ አማራጭ ይዘው ይመጣሉ ሲሉ የተናገሩትን የሚቃረን ሆኗል። ሲፕራስ ትናንት ለህዝባቸው ባሰሙት ንግግር ህዝበ ውሳኔው ከዩሮ መውጣት አለመውጣትን አይመለከትም ብለው ነበር።

«በመጪው እሁድ የሚካሄደው ህዝበ ውሳኔ ግሪክ ከዩሮ ተጠቃሚ ሃገራት ማህበር መውጣት አለመውጣትዋ  የሚወሰንበት ህዝበ ውሳኔ አይደለም። ይህ የሚያከራክር አይደለም። ማንም ይህ ሊጠራጠር አይችልም። እሁድ ዕለት ድምፅ የምንሰጠው የቀረቡልንን ቅድመ ግዴታዎች መቀበል አለመቀበላችንን ወይም ደግሞ እድገት የሚያመጣ መፍትሄ ላይ ነው።»

በሌላ በኩል ውጤቱ እሺታ ከሆነ ከስልጣናቸው እንደሚወርዱ የግሪክ የገንዘብ ሚኒስትር ያኒስ ቫሩፋኪስ ዛሬ ተናግረዋል። የግሪክ ህዝበ ውሳኔ ሁለት ቀናት በቀሩበት በአሁኑ ጊዜ ህዝቡ ግራ መጋባቱ እየተነገረ ነው።  አንዳንድ ዜጎች ሀገሪቱ የምትገኝበት ሁኔታ እንዳሳሰባቸው እየተናገሩ ነው።

«እንደለመታደል ሆኖ ባለፉት ጥቂት ቀናት የአገር ጎብኚዎች ቁጥር ቀንሷል። ልክ ጥር ላይ እንደነበረው ነው። ልክ ክረምት ላይ እንደሚሆነው መንገድ ላይ ሰው አይታይም። ከጎረቤቶችንና ከሆቴል ባለቤቶች እንደምንሰማው ብዙ ጎብኝዎች እዚህ የመምጣት እቅዳቸውን ሰርዘዋል።»

ዋሽንግተን አሜሪካን የፊፋ ባለስልጣናት እንዲሰጧት ጠየቀች

ዩናይትድ ስቴትስ ስዊዘርላንድ ውስጥ ታስረው ጉዳያቸው በመጣራት ላይ ያለውን 7 የወቅቱ እና የቀድሞ የፊፋ ባለሥልጣናትን ስዊትዘርላንድ አሳልፋ እንድትሰጥ ጠየቀች። የዩናይትድ ስቴትስ አቃቤያነ ሕግ የታሰሩት ባለሥልጣናቱ ከገንዘብ ጋር የተያያዙ ልዩ ልዩ ወንጀሎችን በመፈፀም እንደሚጠረጠሩ አስታውቀዋል። ሰባቱ ባለሥልጣናት ባለፉት 24 ዓመታት ከ150 ሚሊዮን ዶላር በላይ የሚሆን ገንዘብ በጉቦ በመውሰድ ከተከሰሰሱት 14 ሰዎች መካከል ናቸው። የስዊስ የፍትህ ሚኒስቴር መሥሪያ ቤት ተጠርጣሪዎቹ ተላልፈው እንዲሰጡ የቀረበውን ጥያቄ በጥቂት ሳምንታት ውስጥ ተግባራዊ እንደሚያደርግ አስታውቋል። 7ቱ ባለስልጣናት ተላልፈው መሰጠታቸውን ተቃውመዋል። ምናልባት ለስዊዘርላንድ ፍርድ ቤት አቤት ሳይሉ አይቀሩም።

HM SL