1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

ዜና | 23.06.2017 | 00:00

ካምፓላ፤ ስደተኞችን የተመለከተዉ ጉባኤ

በርካታ ስደተኞችን ለምታስተናግደዉ ዩጋንዳ ዓለም አቀፍ ትብብር ማሳየት እንደሚያስፈልግ የተመድ ዋና ፀሐፊ አመለከቱ።ዋና ጸሐፊ አንቶኒዮ ጉተሬሽ፤ ዛሬ ኢንቴቤ ላይ በተካሄደዉ የእርዳታ ማሰባሰቢያ ጉባኤ ለዩጋንዳ የሚደረገዉ ትብብር የደግነት ሳይሆን የፍትህ ጉዳይ ነዉ ማለታቸዉ ተዘግቧል። ትናንት በሰሜናዊ ዩጋንዳ የሚገኙ ስደተኞች የሰፈሩባቸዉን አካባቢዎች የጎበኙት ጉተሬሽ ዩጋንዳ ዉስጥ ስደተኞች የሚኖሩት እንደሌሎች ሃገራት በመጠለያ ጣቢያ ሳይሆን መንደር መሥርተዉ መሆኑን ተናግረዋል። ጉተሬሽ አክለዉም ሌሎች ሃገራት ስደተኞችን በሚገፉበት በአሁኑ ወቅት ዩጋንዳ ተሰዳጆች የምታስተናግድበት ፖሊሲ ለሌሎች ምሳሌ እንደሚሆንም አፅንኦት ሰጥተዋል። «የተመለከትነዉ የዩጋንዳ ሕዝብን እና የመንግሥትን ለየት ያለ ደግነት ነዉ። ወደ አንድ ሚሊየን ገደማ የደቡብ ሱዳን ስደተኞችን እንደ እህትና ወንድማቸዉ በመቀበል፤ መሬታቸዉን እና ያላቸዉን ከእነሱ ጋር ተጋርተዋል። በዓለማችን በርካታ ሰዎች በስስት በራቸዉን እና ድንበራቸዉ ስደተኞች እንዳይገቡ ይዘጋሉ፤ ይህ ምሳሌ ከመላዉ የዓለም አቀፉ ኅብረተሰብ ምስጋና እና አድናቆት ሊቸረዉ ይገባል።»የተመ የስደተኞች ከፍተኛ ኮሚሽን እንደሚለዉ ከ947 ሺህ የሚበልጡ የደቡብ ሱዳን ተሰዳጆች ዩጋንዳ ዉስጥ ይኖራሉ። ይህም ዩጋንዳ ዉስጥ የሚኖሩ ስደተኞችን ቁጥር 1,2 ሚሊየን ያደርሰዋል። በኢንቴቤዉ ጉባኤ ለጋሾች 352 ሚሊየን ዶላር ለመስጠት ቃል ገብተዋል። ጉባኤዉ እስከ 2 ቢሊየን ዶላር ለማሰባሰብ አቅዷል።

ናይሮቢ፤ ሰሜን ኬንያ ዉስጥ በታጣቂ ተኩስ ሦስት ተገደሉ

በሰሜን ኬንያ ከሶማሊያ ድንበር አቅራቢያ በምትገኘዉ ማንዴራ ግዛት በዛሬዉ ዕለት አራት ታጣቂዎች በከፈቱት ተኩስ ሁለት ሲቪሎችን እና አንድ ፖሊስ ተገደሉ። ሌሎች ሦስት ሰዎችም ተጎድተዋል። የሮይተርስ ዘገባ እንደሚያመለክተዉ ጥቃት አድራሾቹ ኤልዋክ የሚገኘዉን ባንክ ለመዉረር ሙከራ ያደረጉ ሲሆን ጥቃቱን ካደረሱ በኋላ ወደሶማሊያ ተሻግረዋል። የማንዴራ ፖሊስ ኮማንደር ቻርለስ ቻቻ ወደባንኩ የገቡት ታጣቂዎች አስቀድመዉ ጠባቂ ፖሊሶች ላይ መተኮሳቸዉን፤ ፖሊሶችም አፀፋዉን መመለሳቸዉን ገልጸዋል። የኬንያ ቀይ መስቀል በዚችዉ ከተማ ጓዳ ሠራሽ ፈንጂ ጎዳና ላይ የነጎደ ቢሆንም የተጎዳ እንደሌላ አመልክቷል። ለጥቃቱ ኬንያ የሶማሊያዉን ጽንፈኛ ቡድን አሸባብን ተጠያቂ አድጋለች።

ጋቦሮኒ፤ የቀድሞዉ የቦትስዋና ፕሬዝደንት ማሲሬ አረፉ

የቀድሞዉ የቦትስዋና ፕሬዝደንት ከዚህ ዓለም በሞት በመለየታቸዉ የሐገሪቱ መንግስት የሦስት ቀናት ብሔራዊ ሀዘን አወጀች። ለ18 ዓመታት ገደማ ቦትስዋናን የመሩት ፕሬዝደንት ኬቱሚሌ ማሲሬ በ91 ዓመታቸዉ ነዉ ያረፉት። ቦትስዋና ከቅኝ ግዛት ከተላቀቀች በኋላ የሀገሪቱ ሁለተኛ ፕሬዝደንት የነበሩት ማሲሬ፤ ደቡባዊ አፍሪቃዊቱ ሐገር ላስመዘገበችዉ የኤኮኖሚ ዕድገት እና ለመሠረተችዉ አንፃራዊ ዴሞክራሲ ይወደሳሉ። ሀገራቸዉን በማረጋጋት፤ በአካባቢ ሃገራትም ከፍተኛ የሽምግልና ሚና የተጫወቱት ማሲሬ ስልጣናቸዉንም በፈቃዳቸዉ የለቀቁ አፍሪቃዊ መሪ ነበሩ። ካለፈዉ ሳምንት ጀምሮ በከፍተኛ የህክምና ክትትል ክፍል የቆዩት ማሲሬ በቤተሰቦቻቸዉ እንደተከበቡ በሰላም ማረፋቸዉን የግል ጸሐፊያቸዉ ይፋ ባደረጉት መግለጫ አመልክተዋል። የሀገሪቱ ፕሬዝደንት ኢያን ካሃም፤ የቀብር ሥርዓታቸዉ አፈጻጸም በቀጣይ ቀናት እንደሚገለጽም አስታዉቀዋል። 2 ሚሊየን ሕዝብ ላላት ቦትስዋና የእንቁ ንግድ እና የዱር እንስሳት ቱሪዝም ዋነኛ የገቢ ምንጮች ናቸዉ።

ብራስልስ፤ ከብሬግዚት በኋላ የአዉሮጳ ዜጎች ህልዉና

ብሪታንያ ከአዉሮጳ ኅብረት የሚለያትን ሂደት ካጠናቀቀች በኋላ ብሪታንያ ዉስጥ አምስት ዓመትና ከዚያ በላይ ለኖሩ የሌሎች የአዉሮጳ ሃገራት ዜጎች እዚያዉ መኖር እንዲችሉ እንደምትፈቅድ አስታወቀች። ጠቅላይ ሚኒስትር ቴሬዛ ሜይ ይህን የገለፁት ብሪታንያ ከአዉሮጳ ኅብረት በምትወጣበት ሂደት ላይ ለተነጋገሩት ለአዉሮጳ ኅብረት መሪዎች ነዉ። በብሬግዚት ጉዳይ የተደራደሩት መሪዎች የዜጎች መብት ጉዳይ፤ የአየርላንድ የድንበር ጉዳይ እና በአዉሮጳ ኅብረት የብሪታኒያ የገንዘብ አስተዋፅኦን በሚመለከቱ ነጥቦች ላይ ተነጋግረዋል። በዚህ ጊዜም ሜይ ከ3 ሚሊየን እንደሚበልጡ የሚገመተዉ በብሪታኒያ የሚኖሩ የሌሎች አዉሮጳ ሃገራት ዜጎች ራሳቸዉን የሚያደላድሉበት ጊዜ ተሰጥቷቸዉ የብሪታንያ ዜግነት ማግኘት እንዲችሉ እንደሚደረግ ገልጸዋል። ከቀሪዉ አዉሮጳ ወገንም ተመሳሳይ ምላሽ ጠይቀዋል።የአዉሮጳ መሪዎች ርምጃዉን አዎንታዊ ጅማሮ ብለዉታል። የጀርመን መራሂተ መንግሥት አንጌላ ሜርክል፤«ይህ መልካም ጅማሮ ነዉ፤ ሆኖም ግን በእርግጥ ብዙ ብዙ ጥያቄዎች አልተመለሱም። ለምሳሌ የፋይናንስ ጉዳይ እንዲሁም ከአየርላንድ ጋር ያለዉ ግንኙነት ይዞታም እንዲሁ። እናም እስከ ጥቅምት ብዙ የምንሠራዉ ሥራ አለ።»

ዶሀ፤ የቀጠለዉ የቀጠር እና የአረብ ሃገራት ዉዝግብ

ቀጠር እና በሳዑዲ አረቢያ የሚመሩት ሃገራት የገጠሙት ዉዝግብ ቀጥሏል። የተባበረዉ አረብ ኤሜሬቶች የዉጭ ጉዳይ ሚኒስትር አንዋር ጋርጋሽ ከዶሀ ጋር የዲፕሎማሲ ግንኙነታቸዉን ያቋረጡት የጎረቤት ሃገራትን ፍላጎት ከምር የማትወስደዉ ከሆነ ጭራሹን መለያየት ሊከተል እንደሚችል አሳስበዋል። ሚኒስትሩ አክለዉም ቀጠር፤ የሳዉድ አረቢያ፤ የአረብ ኤሜሬት፤ የባህሬን እና የግብፅን ጥያቄዎች የሚያሳይ ሰነድ እያሾለከች ነዉ ሲሉ ከሰዋል። አራቱ ሐገራት፤ «ቀጠር እንድታደርገዉ እንፈልጋለን የሚሉትን» ለዶኻ ያቀረበችዉ ለሽምግልና መሐል የገባችዉ ኩዌት ናት። በማኅበራዊ መገናኛዎች አማካኝነት ይፋ የሆኑት መረጃዎች እንዳመለከቱት ሳዉዲ መራሹ ጥምረት፤ ቀጠር መቀመጫዉን ዶሀ ያደረገዉን አልጃዚራን እንድትዘጋ፤ ከኢራን ጋር ያላትን የዲፕሎማሲ ግንኙነት ዝቅ እንድታደርግ እንዲሁም ኤሜሬቶች ዉስጥ የሚገኘዉን የቱርክ ወታደራዊ ሰፈር እንድትዘጋ ይጠይቃል። ቱርክ ከአረብ ሃገራቱ የቀረበዉን ጥያቄ እንደማትቀበለዉ በዛሬዉ ዕለት አስታዉቃለች። አልጃዚራ ቴሌቪዥን በበኩሉ በመናገር ነፃነት ላይ የተሰነዘረ ጥቃት ያለዉን ጥያቄ ዉድቅ አድርጓል።

ቱሪንገን፤ ፖሊስ በቀኝ አክራሪነት የተጠረጠሩ ላይ አሰሳ አካሄደ

የጀርመን ፖሊስ ቱሪንገን እና ጎቲንገን በተባሉ ከተሞች በቀኝ አክራሪነት የተጠረጠሩ ግለሰቦች ያደራጇቸዉ በርከት ያሉ ወደ ማሰልጠኛ ጣቢያነት የተቀየሩ መኖሪያ ቤቶች መፈተሹን አስታወቀ። አቃቤ ሕግ ሽቴፈን ፍሊገር እንደገለፁት ፍተሻዉ ከተካሄደባቸዉ ከ13ት ግለሰቦች አንዱ ቤቱ እንዳይፈተሽ ለማደናቀፍ በማንገራገርና ፖሊሶች ላይም ጥቃት በመሰንዘሩ ታስሯል። ፍሊገር አብዛኞቹ ለመረጃ ጥበቃ ሲባል ስሙን ያልጠቀሱት ዓለም አቀፍ የቀኝ ጽንፈኞች ቡድን አባላት ሳይሆኑ እንዳልቀሩ ጥርጣሬ መኖሩንም አመልክተዋል። የፅንፈኞቹ ዒላማዎች ፖሊሶች፣ ጥገኝነት ፈላጊዎች እና አይሁዶች እንደሆኑ የጀርመን የዜና ወኪል ጠቅሷል። የጀርመን ፖሊስ ከቅርብ ወራት ወዲህ በቀኝ ፅንፈኛ ቡድን አባላት ላይ የሚያካሂደዉ አሰሳ እና ፍተሻ ጨምሯል። SL/NM