1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

ኢትዮጵያ

የዶቼ ቬለ መታፈንና የኢትዮጵያ መንግሥት

የአማርኛዉን ሥርጭት ከሚያዚያ ሁለት 2003 ጀምሮ በ17780 ኪሎ ሔርዝ በ16 ሜትር ባነድ ወይም በ11 835 ኪሎ ኸርዝ በ25 ሜርትር ባንድ ወይም በ9800 ኪሎ ኸርዝ በ31 ሜትር ባንድ ማድመጥ ትችላላችሁ።

default

08 04 11

የዶቼ ቬለ የአማርኛ ሥርጭት ባለፉት ጥቂት ቀናት ዉስጥ አልፎ አልፎ ግን ሆን ተብሎ እየታፈነ ወይም ጃም እየተደረገ መሆኑንን የጣቢያዉ የቴክኒክ ባለሙያዎች አስታወቁ።የሥርጭቱን አድማስና ጥራት የሚከታተሉት የቴክኒክ ባለሙያዎች እንዳሉት የአማርኛዉ ዝግጅት የሚሠራጩባቸዉ የሞገድ መስመሮች በፈረቃ በሚመስል መልኩ እየታፈኑ ነዉ።ዶቸ ቬለ እርምጃዉን ተቃዉሞታል።የኢትዮጵያ መንግሥት ባለሥልጣናት ግን ስርጭቱ ሆን ተብሎ ሥለመታፈኑ የምናዉቀዉ ነገር የለም ብለዋል።ነጋሽ መሐመድ ዝር ዝር ዘገባ አለዉ።


የተለያዩ አድማጮች ከተለያዩ አካባቢዎች በላኳቸዉ የSMS መልዕክቶች የዶቸ ቬለ ሥርጭት አንዳዴ ሙሉ በሙሉ፥ ሌላ ጊዜ በከፊል፥ አልፎ አልፎ እያሰለሰ እንደሚታፈን፥ ወይም በስርጭቱ መሐል ያልተለመደ ባዕድ ረባሽ ድምፅ እንደሚገባበት በተደጋጋሚ እያስታወቁን ነበር።የዶቸ ቬለ የሥርጭትና የሞገድ መስመሮች ጥራት ክፍልም ይሕኑ ነዉ ያረጋገጠዉ።

የክፍሉ የቴክኒክ ባለሙያዎች ባደረጉት ክትትል መሠረት ቢያንስ በሁለት የሞገድ መስመሮች የሚተላለፈዉ የአማርኛ ሥርጭት ሆን ተብሎ መታፈኑ ወይም መታወኩ ተረጋግጧል።የቅርቡ አብነት የትናንቱ ሥርጭት ነዉ።የቴክኒክ ክፍሉ እንዳረጋገጠዉ ትናንት ከተለያዩ የማሰራጪያ ሞገዶቻች አንዱ ከ11 ሠዓት ከ14 ደቂቃ እስከ 11 ሠዓት 38 ደቂቃ ድረስ፥ ሁለተኛዉ ደግሞ ከ11: 14 ደቂቃ እስከ 11 ከ33 ደቂቃ ድረስ ታፍኖ ወይም ጃም ተደርጎ ነበር።

Christian Gramsch

የዶቸ ቬለ የፕሮግራሞች የበላይ ሐላፊ


ስርጭቱ የሚታፈነዉ ወይም የሚታወከዉ ከኢትዮጵያ አካባቢ እንደሆነ ባለሙያዎቹ ጠቁመዋል። የዶቸ ቬለ የፕሮግራሞች የበላይ ሐላፊ ክርስቲያን ግራምሽ የኢትዮጵያ መንግሥት የዶቸ ቬለ ሥርጭት ከእወካ ነፃ መሆኑን እንዲያረጋግጥ ጠይቀዋል።

«ይሕ አዲሱ እርምጃ ዶቸ ቬለ ሚዛኑን የጠበቀ ፖለቲካዊ፥ ምጣኔ ሐብታዊ እና ማሕበራዊ ጉዳዮችን የሚዳስስ መረጃ ለኢትዮጵያና ለአካባቢዋ አድማጮች እንዳያሰራጭ ያደናቅፈዋል።ሥለዚሕ የኢትዮጵያ መንግሥት የዶቸ ቬለ የአጭር ሞገድ መስመሮች ከእወካ ነፃ መሆናቸዉን እንዲያረጋግጥ እጠይቃለሁ።»

የዶቸ ቬለ የአማርኛ ሥርጭት ሆን ተብሎ ሲታፈን ወይም ሲታወክ ያሁኑ የመጀመሪያዉ አይደለም። በቅርቡ ብቻ በሁለት ሺሕ አመተ-ምሕረት ለተከታታይ ወራት እና ባለፈዉ አመት ግንቦት ወር አካባቢም ታፍኖ ነበር።በዚያን ወቅት ለደረሰዉ አፈና ለፕረስ ነፃነት የሚሟገቱ ወገኖች ባንድ ወይም በሌላ መልኩ የኢትዮጵያ መንግሥትን ወቅሰዉ ነበር።

የኢትዮጵያ መንግሥት የያኔዉን ወቀሳ አልተቀበለዉም ነበር።አሁንም የኢትዮጵያ የመገናኛ ወይም የኮሚኒኬሽን ጉዳዮች መስሪያ ቤት ምክትል ሐላፊ አቶ ሽመልስ ከማል «ዶቸ ቬለ አልታወከም» ብለዋል።

Screenshot Google Maps Deutsche Welle

የዶቼ ቬለ የቴክኒክ ባለሙያዎች እንደሚሉት ሰሞኑን የደረሰዉ አፈና፥ እወካ ወይም ጃሚንግ ከዚሕ ቀደም ከደረሰዉ ጋር ተመሳሳይ ነዉ።የኮሚኒኬሽን ጉዳዮች ምክትል ሐላፊ አቶ ሽመልስ ከማል ግን መጀመሪያ አጣሩ ነዉ ያሉት።
ዶቸ ቬለ የአማርኛዉን ሥርጭት ከሚያዚያ ሁለት 2003 በ17780 ኪሎ ሔርዝ በ16 ሜትር ባነድ ወይም በ11 835 ኪሎ ኸርዝ ወይም በ25 ሜርትር ባንድ ማድመጥ ትችላላችሁ።

ነጋሽ መሐመድ
ሒሩት መለሰ