1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

አፍሪቃ

የደቡብ አፍሪቃ መንግሥት የ«አይ ሲ ሲ» አባልነት ጥያቄ

የደቡብ አፍሪቃ መንግሥት በቅርቡ በሀገሩ በተካሄደው የአፍሪቃ ህብረት የመሪዎች ጉባዔ ላይ የተካፈሉትን እና በዓለም አቀፉ የጦር ወንጀለኞች ተመልካች ፍርድ ቤት የእስር ማዘዣ የተላለፈባቸውን የሱዳን ፕሬዝደንት ኦማር ሀሰን አል በሽርን ባለማሰሩ የሚሰነዘርበት ወቀሳ አሁንም እንደቀጠለ ነው።

አውዲዮውን ያዳምጡ። 03:33

የደቡብ አፍሪቃ መንግሥት እና የ«አይ ሲ ሲ » አባልነቷ ጥያቄ

ወቀሳው እና ንትርኩ በቀጠለበት ባሁኑ ጊዜ የሀገሪቱ መንግሥት የዓለም አቀፉ የጦር ወንጀለኞች ተመልካች ፍርድ ቤት፣ በምህፃሩ የ «አይሲሲ»ን አባልነቱን ይዞ መቆየት አለመቆየቱን በጥሞና እንደሚያጤነው አስታወቀ።የኃያላኑ መንግሥታት እና የመብት ተሟጋቾች የደቡብ አፍሪቃ መንግሥት አንድ የሀገሩ ፍርድ ቤት በሺር እንዲታሰሩ ያሳለፈውን ትዕዛዝ ችላ በማለት ወደ ሀገራቸዉ በተመለሱበት ድርጊት የተነሳ ባለፈው እአአ ሀምሌ 15፣ 2015 ዓም የተጀመረው ዲፕሎማቲክ ንትርክ በአፍሪቃ እና በበለፀጉት ሀገራት መካከል ዓለም አቀፉ የጦር ወንጀለኞች ተመልካች ፍርድ ቤት በያዘው ሚና ላይ የተፈጠረው ልዩነት እየሰፋ መሄዱን አሳይቷል። እንደ አፍሪቃ ህብረት ተንታኝ እና አማካሪ ሊዝል ሎቭ አስተያየት፣ የደቡብ አፍሪቃ ገዢው የአፍሪቃውያን ብሔረተኞች እንቅስቃሴ «ኤ ኤን ሲ» በፍርድ ቤቱ አኳያ ያለውን ጥርጣሬ የፓርቲው ዋና ጸሐፊ ግዌዴ ማንታሼ ፍርድ ቤቱን አደገኛ ሲሉ ነው የገለጹበት አነጋገራቸው አንፀባርቋል።

Südafrika Omar al-Baschir in Johannesburg

ፕሬዚደንት ኦማር ሀሰን ኤል በሺር

« አል በሺር ይታሰራሉ አይታሰሩም በሚል መላ ምት በተሰማበት የአፍሪቃ ህብረት ጉባዔ በተካሄደበት ጊዜ እንኳን አንዳንድ ለ«ኤ ኤን ሲ » ቅርበት ያላቸው ሀያስያን ፍርድ ቤቱ እስካሁን ያሰረው አፍሪቃውያንን መሆኑን ጠቁመዋል፣ ፍርድ ቤቱ ያነጣጠረው በተለይ በአፍሪቃውያን ላይ ነው በሚል የአፍሪቃ ህብረት ያሰማው ቅሬታም በ«ኤ ኤን ሲ » እና ባንዳንድ የደቡብ አፍሪቃ ህብረተሰብም ዘንድ ሲሰነዘር ይሰማል። »

ይህ አቋሙም ውሎ አድሮ ከ« አይ ሲ ሲ » ለቆ ወደመውጣቱ ሊያመራ እንደሚችል ጠቋሚ ሊሆን ይችል እንደሆን ከዶይቸ ቬለ ለቀረበላቸው ጥያቄ ሊዝ ሎቭ ሲመልሱ፣

Parteitag des ANC Südafrika

ግዌዴ ማንታሼ(በስተቀኝ)

« ወደዚያ የሚያመራ ይመስላል፣ እንደሚታወቀው የ« ኤ ኤን ሲ » ዋና ጸሐፊ ግዌዴ ማንታሼ ከፍተኛ ተፅዕኖ ያሳረፉ ፖለቲከኛ ናቸው። ይሁንና፣ የህግ ባለሙያዎች እንደሚሉት፣ ፍርድ ቤቱን ለቆ መውጣቱ ለደቡብ አፍሪቃ ቀላል አይሆንም፣ የተወሳሰበ ነው ምክንያቱም ፍርድ ቤቱ የተቋቋመበት የሮሙ ሰነድ በሀገሪቱ ሕግ ውስጥ ተካቶዋል። የፍርድ ቤቱን አባልነት ብትሰርዝም በሰነዱ የሰፈሩትን ውሳኔዎች ማክበር ይኖርባታል። ማለትም አባልነቷን ከሰረዘችም በኋላ እንበል የሱዳኑ መሪ አል በሺር ደቡብ አፍሪቃን ቢጎበኙ አስራ ለፍርድ ቤቱ ማስረከብ አለባት። እና ከ« አይ ሲ ሲ » መውጣት የምትችልበት ሂደቱ ለምክር ቤት መቅረብ ስለሚኖርበት ረጅም ነው የሚሆነው። »

እንደ ሊዝ ሎቭ ግምት ደቡብ አፍሪቃ ከ ከ« አይ ሲ ሲ » የምትወጣበት ድርጊት ከአንዳንድ የህብረተሰብ ክፍል እና ኦማር ሀሰን አል በሺር ከተከሰሱ ወዲህ ከፍርድ ቤቱ አባልነት የመውጣትን ሀሳብ ካራመደው ከአፍሪቃ ህብረት ድጋፍ ቢያስገኝለትም በዓለም አቀፍ አጋሮቹ ዘንድ ተዓማኒነቱን ያጣል።

አርያም ተክሌ

ማንተጋፍቶት ስለሺ

Audios and videos on the topic