1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

አፍሪቃ

የደቡብ ሱዳን የረሃብ አደጋ ስጋትና ኦክስፋም

ጦርነት በቀጠለባት ደቡብ ሱዳን ለረሃብ አደጋ ለተጋለጠው ህዝብ አስቸኳይ እርዳታ ለማቅረብ ለጋሽ ሃገራት ገንዘብ እንዲለግሱ ተጠየቁ ። ኦክስፋም የተባለው የብሪታኒያ ግብረ ሰናይ ድርጅት ለችግሩ ከወዲሁ አፋጣኝ መልስ ካልተሰጠ በሚሊዮኖች የሚቆጠሩ ደቡብ ሱዳናውያን ህይወት አደጋ ላይ እንደሚወድቅ አስጠንቅቋል ።

የድርጅቱ የዓለም ዓቀፍ ፖሊሲ አውጭ ና የዘመቻ ክፍል ሃላፊ ማክስ ሎውሰን ለዶቼቬለ የአማርኛው ክፍል በሰጡት ቃለ ምልልስ በሚሊዮኖች የሚቆጠሩ ደቡብ ሱዳናውያን ረሃብ ያሰጋቸዋል ።

5 ኛ ወሩን የያዘው የደቡብ ሱዳን ግጭት በሺህዎች የሚቆጠሩ ሰዎችን ህይወት አጥፍቷል ፤ 1.2 ሚሊዮን የሚደርሱ ሰዎችንም አፈናቅሏል ። ጦርነቱ ከገደለውና ካፈናቀለው ሌላ በርካታ ደቡብ ሱዳናውያንንም ለረሃብ ማጋለጡን በደቡብ ሱዳን እርዳታ የሚያቀብለው የኦክስፋም የዓለም ዓቀፍ ፖሊሲ አውጭ ና የዘመቻ ክፍል ሃላፊ ማክስ ሎውሰን ለዶቼቬለ ተናግረዋል ።

«ከደቡብ ሱዳን ህዝብ ከአንድ ሶስተኛው በላይ ወደ 4 ሚሊዮን የሚጠጋው የረሃብ አደጋ ያሰጋዋል ። በመላው ሃገሪቱ እጅግ አሳሳቢ ና ከባድ የምግብ እጥረት አለ ። »

ሎውሰን እንደሚሉት በአስከፊ ሁኔታ ውስጥ ከሚገኙት ደቡብ ሱዳናውያን ይበልጥ ተጎጂዎቹ ደግሞ ህጻናት ናቸው ።

«በቅርቡ ደቡብ ሱዳን ነበርኩ በድህነት የተጠቁት እነዚህ ህዝቦች በጦርነቱ ምክንያት እህል መዝራት አልቻሉም ። ያማለት ሰብል አይሰበስቡም ። ይህ ማለት ደግሞ ልጆቻቸው በረሃብ ይጠቃሉ ማለት ነው ። ኦክስፋም እስካሁን 200 ሺህ ለሚሆኑ ሰዎች እርዳታ አቅርቧል ። በኛ ስሌት 200 ሺህ ህጻናት በምግብ እጥረት ምክንያት በተከሰቱ የጤና ችግሮች ሰበብ ህክምና ያስፈልጋቸዋል ።

ስለዚህ ይላሉ ሎውሰን ለጋሽና ሃብታም ሃገራት እነዚህን ሰዎች መመገብ የሚያስችል ገንዘብ መርዳት ይገባቸዋል ። ድርጅታቸው ኦክስፋም ለደቡብ ሱዳን እርዳታ ለማሰባሰብ በሚቀጥለው ሳምንት ኦስሎ ኖርዌይ ውስጥ በሚካሄደው የለጋሽ ሃገራት ጉባኤ ላይ ዓለም ዓቀፉ ማህብረሰብ እርዳታ ለመስጠት ቃል ይገባሉ ብሎ ይጠበቃል ።

«ለደቡብ ሱዳን ከተጠየቀው እርዳታ 40 ከመቶው ብቻ ነው የተገኘው ስለዚህ ለጋሽ ሃገራት ተጨማሪ 700 ሚሊዮን ዶላር እንዲሰጡ እንፈልጋለን ገንዘቡ እንዳላቸው እናውቃለን ።ደቡብ ሱዳን ላይ እጅግ የከፈ ቀውስ እየመጣ መሆኑንም እናውቃለን ። እናም ይህን አስፈላጊ የሆነውን ገንዘብ በመጪው ሳምንት በኦስሎው ጉባኤ ላይ በአስቿኳይ እንዲሰጡ እንሻለን ። »

የደቡብ ሱዳኑን ግጭት ለማስቆም አዲስ አበባ ውስጥ ሁለት ጊዜ የተኩስ አቁም ስምምነት ቢፈረምም ተዋጊዎቹ ስምምነቱን ከቁብም የቆጠሩት አይመስልም ። ጦርነቱ ጋብ እንኳን አለማለቱ የእርዳታ ማቀበሉን ስራን አስቸጋሪ ቢያደርገውም ኦክስፋም ግን በደቡብ ሱዳን ግብረ ሰናይ ተግባሩን አላቋረጠም እንደ ሎውሰን ።

«ብዙዎች ሰዎች ጋ መድረስ አስቸጋሪ ነው ብለን እናስባለን ።ሆኖም አሁን ይህን እያደረግን ነው። ኦክስፋም በጣም አስቸጋሪና የተመሳቀሉ ሁኔታዎች ባለቡት ጊዜ ሁሉ ድሃው ህብረተሰብ ጋ የመድረስ ልምድ አለው ።»

ዘላቂው መፍትሄ ሰላም ቢሆንም ይላሉ ሎውሰን ረሃቡ ግን ጊዜ የሚሰጠው አይደለም ።

« በተቻለ ፍጥነት በሱዳን ሰላም መስፈን ይኖርበታል ሆኖም ረሃብ ለሚያሰጋቸው ደቡብ ሱዳናውያን እርዳታ ለመስጠት ሰላም እስኪመጣ መጠበቅ አንችልም »

ሂሩት መለሰ

ነጋሽ መሀመድ

Audios and videos on the topic