1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

አፍሪቃ

የደቡብ ሱዳን ተቀናቃኞች አዲስ ስምምነት

ጦርነት የገጠሙት የደቡብ ሱዳን ተቀናቃኝ ኃይሎች ትናንት አሩሻ ታንዛኒያ ላይ የእርስ በርስ ጦርነቱን ሊያስቆም የሚችል አዲስ ስምምነት መፈራረማቸዉ ተሰማ።

ስልጣን ላይ ሚገኙት ፕሬዝደንት ሳልቫ ኪር እና ተቀናቃኛቸዉ የአማፅያኑ መሪ ሪየክ ማቻር የተፈራረሙት ዉል የተከፋፈለዉን ገዢዉን የሱዳን ሕዝቦች ነፃ አዉጭ ንቅናቄ (SPLM)ን ወደአንድነት ሊመስል ይችላል ተብሏል። በአዲሲቷ አፍሪቃዊት ሀገር በአንጋፋ ፖለቲከኞቿ መካከል አለመግባባቱ ንሮ ወደጦርነት ከተሸጋገረ ወዲህ ሁለቱ ወገኖች በተግባር ያልተገለፁ ተደጋጋሚ ስምምነቶች ተፈራርመዋል።

በደቡብ ሱዳን አንጋፋ ፖለቲከኞች መካከል የተፈጠረዉ አለመግባባት ነፍጥ ሲያማዝዛቸዉ ለዓመታት ለደቡቡ የሱዳን ሕዝብ ነፃነት ሲታገል እንደቆየ የሚነገርለት የአዲሲቱን ሀገር ገዢ ፓርቲ SPLMን በጎሳ አቧድኖ ነዉ የከፋፈለዉ። ይህም አንዱ በሌላኛዉ ጎሳ ላይ የአፀፋ ጥቃትና የጅምላ ጭፍጨፋ እስከመፈፀም አዳርሶ በሺና አስር ሺዎች የሚቆጠሩ ዜጎችን ነፍስ ሲያጠፋ መቶ ሺዎችን አሰድዶ በበርካቶች ላይ የረሃብ አደጋ እንዲያንዣብብ አድርጓል።

ትናንት በታንዛኒያ መሪዎች ሸምጋይነት አሩሻ ከተማ በፕሬዝደንት ሳልቫ ኪርና በአማፅያኑ መሪ ሪየክ ማቻር መካከል ሁለቱ ተፋላሚዎች የፈረሙት ስምምነት የተከፋፈለዉን ገዢዉን ፓርቲ ወደአንድነት ሊመልሰዉ እንደሚችል ነዉ በሸምጋዮቹ የተነገረዉ። የዓለም አቀፍ የፀጥታ ጥናት ተቋም የሰላም እና የፀጥታ ምክር ቤት የሪፖርት ኃላፊ ዶክተር ሰሎሞን ደርሶ የደቡብ ሱዳን የፖለቲካ አንጃዎች የሚያሳዩት ባህሪ ካልተለወጠ የስምምነቱ ዘላቂነት አጠራጣሪ እንደሆነ ያመለክታሉ።

የሀገሪቱ ፕሬዝደንት ሳልቫ ኪር ምክትላቸዉ የነበሩትን ሪየክ ማቻርን ከስልጣን ሊገለብጡኝ አሲረዋል ሲሉ ከከሰሱበት ከጎርጎሪዮሳዊዉ 2013ዓ,ም ታኅሳስ ወር ጀምሮ ወደጦርነት ከገቡ ወዲህ በተካሄዱ የሽምግልና መድረኮች የተፈረሙት አምስት የተኩስ አቁም ስምምነቶች አንዳቸዉም በተግባር አልተገለፁም። ከምን በላይ የራሳቸዉን የስልጣን ሕልዉና በማስቀደም የሚወቀሱት የደቡብ ሱዳን ፖለቲከኞች አዲስ አበባ ላይ በምሥራቅ አፍሪቃ የልማት በይነ መንግሥታት IGAD አማካኝነት በተካሄዱ ድርድሮች መስመር የያዙ ጉዳዮች ሕይወት እንዳይኖራቸዉ ቢያደርጉም የትናንቱ ስምምነታቸዉ እንዲሁ ከንቱ ተደርጎ መታየት አይኖርበትምም ይላሉ ዶክተር ሰሎሞን፤

Salva Kiir mit Jakaya Kikwete und Riek Machar

አደራዳሪዉ የታንዛኒያ ፕሬዝደንት ጃካያ ኪክዌቴ እና ሳልቫ ኪርና ሪየክ ማቻር ከስምምነቱ በኋላ

ዘገባዎች እንደሚሉት የአሩሻዉ የደቡብ ሱዳን የሰላም ዉይይትና ስምምነት አዲስ አበባ ላይ በያዝነዉ ወር ማለቂያ ላይ ከሚካሄደዉ የአፍሪቃ ኅብረት ጉባኤ ጎን ለጎን በIGAD አማካኝነት ለሚኖረዉ የሁለቱ ወገኖች ድርድር ተጓዳኝ ነዉ። አደራዳሪዎቹ የታንዛኒያ ባለስልጣናትም ተቀናቃኞቹን ያደራደሩት SPLMን የከፈለዉን ልዩነት ለማስታረቅ እንጂ የተኩስ ማቆሙና መሰሉ ድርድር አዲስ አበባ ላይ በኢጋድ እንደሚከናወን አመልክተዋል። ዶክተር ሰሎሞን በኢጋዱ ድርድር ወቅት ደም የተቃቡት ፖለቲከኞች በሽግግር መንግሥቱ አብረዉ ለመሥራት የሚወያዩበት አጋጣሚ ስለሆነ በደቡብ ሱዳን ለቀጠለዉ የእርስ በርስ ጦርነት ወሳኝ መሆኑን አመልክተዋል።

ሸዋዬ ለገሠ

ኂሩት መለሰ

Audios and videos on the topic