የኮንጎ ምርጫ ሲገመገም | የጋዜጦች አምድ | DW | 01.08.2006
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

የጋዜጦች አምድ

የኮንጎ ምርጫ ሲገመገም

ድምፅ ከተሰጠባቸው ጣቢያዎች አንዱ

default

በዲሞክራሲያዊ ሪፐብሊክ ኮንጎ ባለፈው ዕሁድ የተካሄደው ፕሬዝዳንታዊ ምርጫ የዓለም ዓቀፉ ማህበረሰብ አድናቆት እየተቸረው ነው ። ዩናይትድስቴትስና የአውሮፓ ህብረት የምርጫው ሂደት ሰላማዊና የተሳካ ነበር ብለዋል ። በሀገሪቱ ታሪክ ከአርባ ዓመት በኋላ ለመጀመሪያ ጊዜ የተካሄደው የመድብለ ፓርቲ ምርጫ ነፃና ዲሞክራሲያዊ እንደነበር የኮንጎ ዜጎች እና ታዛቢዎችም መስክረዋል ። ይሁንና ከዕጩ ተወዳዳሪዎች ሁለቱ የምርጫው ሂደት ነፃ ካልመሰላቸው ውጤቱን እንደማይቀበሉ ከወዲሁ እያስታወቁ ነው ። ዓለም ዓቀፍ ታዛቢዎች በበኩላቸው ማንኛውም ቅሬታ በህጋዊ መንገድ መልስ ያገኛል ይላሉ ። “እኔ ደስተኛ ነኝ ። ትኩረት የተሰጠው እና ለመጀመሪያ ጊዜ የተካሄደውን የዚህን ምርጫ ውጤት በናፍቆት እንጠብቃለን ። የምርጫውን አስተናባሪዎች እናመሰግናለን “
በኮንጎ ድምፅ ከሰጡት አንድዋ የተናገሩትን ነበር ። ብዙዎች ተመሳሳይ አስተያየት ነው የሚሰጡት ።ዕሁድ ዕለት በዲሞክራሲያዊ ሪፐብሊክ ኮንጎ ባተካሄደው ምርጫ የተሰጠው ድምፅ ቆጠራ ተጀምሮዋል ። የቆጠራው ውጤት ግን እንዲህ በአጭር ጊዜ ሊታወቅ አይችልም ።የትራንስፖርትና የመገናኛ አገልግሎት ሰፊ ግዛት ባላት ኮንጎ ደካማ በመሆኑ የመጀመሪያው ውጤት ይፋ እስኪሆን ድረስ ሶስት ሳምንት ይወስዳል ነው የተባለው ። በውጤቱ ከዕጩ ተወዳዳሪዎች አንዳቸውም ከሀምሳ በመቶ በላይ ድምፅ ካላገኙ ሌላ ምርጫ መካሄዱ አይቀርም ። ውጤቱ ይህ ከሆነ መምረጥ የሚችለው ሀያ አምስት ሚሊዮን የኮንጎ ዜጋ በሚቀጥለው ዓመት በጥቅምት ወር በአሁኑ ምርጫ ከፍተኛ ድምፅ ላገኙት ሁለት ተፎካካሪዎች እንደገና ድምፅ ለመስጠት ይወጣል ። የዚህ ውጤትም እስከ ህዳር ይቆያል ። ሰላሳ ሶስት ዕጩዎች ለፕሬዝዳንትነት እንዲሁም ከዘጠኝ ሺህ ሰባት መቶ የሚበልጡ ተፎካካሪዎች ለምክርቤት አባልነት በተወዳደሩበት ምርጫ ከተጠበቀው በላይ ህዝብ ነበር ድምፅ ሊሰጥ የወጣው ። የድምፅ አሰጣቱ ሂደትም እንደተፈራው አልነበረም ። የምርጫው ሂደት በመላው ሀገሪቱ በአጠቃላይ ሰላማዊ ሆኖ ነው የተገባደደው ። ምርጫውን ለመከታተል ከአውሮፓ ብቻ ሶስት መቶ ያህል ታዛቢዎች ነበሩ ። አንዳንዶቹ እንዳሉትም ምርጫው በቀና መንገድ ነው የተካሄደው ። የተሳካም ነበር ።ከታዛቢዎቹ አንዱ ጀርመናዊው ኡልሪሽ ሽቶክማን ናቸው ።
“እኔ የታዘብኩት የምርጫው ሂደት ነፃና ግልፅ በተጨማሪም ከተጨባጩ ሁኔታ አንፃር ሲታይ ስኬታማ መሆኑን ነው “
ከታዛቢዎች አንዳንዶቹ በዚህ መልኩ የምርጫውን ሂደት ሲያወድሱ ሌሎች ደግሞ ከምርጫው በህዋላ ለሚመጣው ስራ መዘጋጀት ዋነኛው ትኩረት ሊሆን ይገባል በማለት ያሳስባሉ ።
“ምርጫን ከከሰርግ ቀን ጋር ነው የማመሳስለው ። ትልቅ ድግስ ነው ። ትዳሩ የሚጀምረው በማግስቱ ነው ።ያኔ ነው ዕውነተኛው ዓለም የሚጀምረው ። ይህም ከምርጫ ጋር ይመሳሰላል ። ይህ ለሀገሪቱ አንድ ትልቅ ዕርምጃ ነው ። በጣም ጠቃሚ ምዕራፍ ነው ይሁንና በኮንጎ ሰላም ለማስፈን ከሚጥሩ ወገኖች በኩል ብዙ ስራና ቁርጠኝነትን ይጠይቃል ።”
እዚህ ውጤት ላይ ለመድረስ የኮንጎ ዜጎች ብዙ አስተዋፅኦ አድርገዋል ። ያምሆኖ የኮንጎ ምርጫ ውጤት በርካታ ፈተናዎች እንደሚገጥሙት ማስጋቱ አልቀረም ። ምርጫውን ያሸንፋሉ ተብሎ በስፋት የሚነገርላቸው የጆሴፍ ካቢላ ተቀናቃኞች የቀድሞዎቹ ዓማፅያን የምርጫው ውጤት ፍትሀዊ ካልሆነ ላንቀበል እንችላለን ሲሉ ከአሁኑ ማስፈራራት ጀምረዋል ። ከዚህ በተጨማሪም በምስራቅ ኮንጎ የህግ የበላይነት አለመስፈኑ ሌላው አሳሳቢ ችግር ሆኖዋል ። በዚህ አካባቢ የሚንቀሳቀሱትና በጦር ወንጀለኝነት የተከሰሱት ዓማፂው ጀነራል ሎሮን ንኩንዳ አናሳ ቡድኖች በአዲሱ መንግስት ካልታቀፉ ዕርምጃ እንወስዳለን ማለታቸውም አስግቷል ። ከዚህ ሌላ አነስተኛ ደሞዝ የሚያገኙት የመንግስት ወታደሮችም ህዝባቸውን ይዘርፋሉ ። እነዚህ ሁሉ ችግሮች እያሉም ግን ህዝቡ ምርጫው በርስ በርስ ግጭት በደቀቀችው ኮንጎ ሰላም ያወርዳል የሚል ተስፋ አለው ።