የኢትዮጵያ ጦርና ሶማሊያ | አፍሪቃ | DW | 25.04.2013
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

አፍሪቃ

የኢትዮጵያ ጦርና ሶማሊያ

ኢትዮጵያ ከሶማሊያ ብትወጣ የሚፈጠረው የፀጥታ ክፍተት ለአሸባብ አመቺ ሁኔታ መፍጠሩ እንደማይቀር ተናግረዋል ። ይሁንና ኢትዮጵያ ወታደሮቿ በቅርቡ ከሶማሊያ እንደሚወጡ ብትናገርም ፣ ለራሷ የፀጥታ ጠቀሜታ ስትል እርምጃውን ትወስዳለች ተብሎ አይታሰብም ።

ኢትዮጵያ በቅርቡ እንዳስታወቀችው ወታደሮቿን ከሶማሊያ ካስወጣች በሶማሊያ ተጨማሪ የፀጥታ ችግር  ሊከሰት  እንደሚችል ተገለፀ ። በጉዳዩ ላይ ለዶቼቬለ አስተታየታታቸውን የሰጡት የምሥራቅ አፍሪቃ የፀጥታ ጉዳዮች ተመራማሪ አንድሪውስ አታ አሳሞዋ ኢትዮጵያ ከሶማሊያ ብትወጣ  የሚፈጠረው የፀጥታ ክፍተት ለአሸባብ አመቺ ሁኔታ መፍጠሩ እንደማይቀር ተናግረዋል ። ይሁንና ኢትዮጵያ ወታደሮቿ በቅርቡ ከሶማሊያ እንደሚወጡ ብትናገርም ፣ ለራሷ የፀጥታ ጠቀሜታ ስትል እርምጃውን ትወስዳለች ተብሎ አይታሰብም ።
የኢትዮጵያ ጠቅላይ ሚኒስትር አቶ ኃይለ ማርያም ደሳለኝ ከትንንት በስተያ ማክሰኞ ለህዝብ ተወካዮች ምክር  ባሰሙት ንግግር መንግሥታቸው ሶማሊያ የሚገኙትን ወታደሮች በሙሉ በቅርቡ እንደሚያስወጣ አስታውቀዋል ። ጠቅላይ ሚኒስትሩ እንዳሉት የኢትዮጵያ ወታደሮች አሁን በአፋጣኝ ሶማሊያን እየለቀቁ ወደ ድንበር አካባቢ እንዲሰፍሩ ይደረጋል ። ኢትዮጵያ እንዳለችው ይህን እርምጃ የምትወስድ ከሆነ ፕሪቶሪያ ደቡብ አፍሪቃ የሚገኘው የዓለም ዓቀፍ የፀጥታ ጥናት ተቋም ባልደረባ አንድሪውስ አታ አሳሞዋ  የሶማሊያ ፀጥታ መደፍረሱ አይቀርም ብለዋል ። አሳሞዋ ለዚህ አባባላቸውም አብነት ጠቅሰዋል  


« ኢትዮጵያ ሰፋ ባሉ አካባቢዎች ጥብቅ የፀጥታ ቁጥጥር ታደርጋለች ። እንደሚመስለን የኢትዮጵያ ኃይሎች መውጣት በአፋጣኝ በአሸባብ ኃይሎች የሚሞላ የፀጥታ ክፍተት እንዲፈጠር ያደርጋል በቅርቡ የኢትዮጵያ ወታደሮች ባከል ከሚገኙ አንዳንድ አካባቢዎች ለቀው ሲወጡ አሸባብ   እነዚህን ቦታዎች መልሶ ለመያዝ ጊዜ አልፈጀበትም ። ምትክ ሳይገኝ ኢትዮጵያ ከያዘቻቸው አካባቢዎች ለቃየምትወጣ ከሆነ ፅጥታ እየደፈረሰ መሄዱን ማየታችን አይቀርም ። »
የኢትዮጵያ ወታደሮች ከሶማሊያ ሲወጡ እንደ አሳሞዋ የሚፈጠረው ችግር ይህ ብቻ አይደለም  ። ህዝቡም ለሌላ አደጋ መጋለጡ አይቀርም ።
« ፀጥታ መደፍረሱ ብቻ አይደለም አሸባብ በነዚህ አካባቢዎች የሚገኙ ህዝቦችን የኢትዮጵያ ወታደሮች በመደገፋቸው ምክንያት ለማንገላታትና ለማሰቃየት መሞከሩም አይቀርም ። ያ ማለት ወደፊት የሃገሪው ነዋሪዎች ሠላም እንዲሰፍንና ለፀጥታ ተብሎ ለማንናውም የውጭ ኃይል የሚሰጡትን ድጋፍም ዋጋ ያሳጣል ። ስለዚህ እስካሁን የተገኙትን ውጤቶች ፍሬ አልባ ሊያደርግ ስለሚችል ለዚህ እርምጃ አፋጣን ምላሽ መስጠቱ አስፈላጊ ነው ።»

አቶ ኃይለ ማርያም እንዳሉት ኢትዮጵያ የሶማሊያ ዘመቻ ወጪዋን የምትሸፍነው ራሷ ናት ። ሶማሊያ ውስጥ ወታደሮቻቸውን በሶማሊያ ሠላም አስከባሪ ኃይል ስራ ያዘመቱ ሌሎች የአፍሪቃ ሃገራት ገንዘብ ሲከፈላቸው የኢትዮጵያ ሠራዊት ግን በዚህ  ውስጥ አልተካተተም ። ለኢትዮጵያ ቅሬታ ዋነኛው ምክንያት ሊሆን የሚችለው ይኽው የገንዘብ ጉዳይ ሳይሆን እንዳልቀረ ሮይተርስ ዲፕሎማቶችን ጠቅሶ ዘግቧል ። ሆኖም ኢትዮጵያ ወታደሮቿን  ከሶማሊያ አስወጣለሁ ብትልም ፣ ለራሷ የፀጥታ ጥቅም  ስትል ይህን እርምጃ ትወስዳለች ተብሎ አይገመትም ።  አሳሞዋ ግን ዘላቂው መፍትሄ ሶማሊያውያንን ብቁ ማድረግ ብቻ ነው ይላሉ ።  
« የሶማሊያ ፀጥታ በአስተማማኝነት እንዲቀጥል በሶማሊያዎች የሚመራ የፀጥታ ኃይል መገንባት አሁን ሶማሊያ የሚገኙትን የውጭ ኃይሎች የሚተካ ሠራዊት ማደራጀት ወሳኝ ነው ። አሁን መደረግ ያለበት ፣ መንግሥት በመላ ሃገሪቱ ፀጥታ ማስከበር እንዲችል ማብቃት ነው ። »

ሂሩት መለሰ

ተክሌ የኋላ

Audios and videos on the topic

ተዛማጅ ዘገባዎች