የኢትዮጵያ ኤኮኖሚና የሕብረተሰቡ ሃቅ | ኤኮኖሚ | DW | 19.03.2008
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

ኤኮኖሚ

የኢትዮጵያ ኤኮኖሚና የሕብረተሰቡ ሃቅ

አፍሪቃ በኤኮኖሚ ዕድገት ተሥፋ ሰጭ ዕርምጃ እያደረገች መምጣቷ በተደጋጋጊ ይሰማል። ለምሳሌ የዓለም ባንክ ባለፈው ዓመት ዓመታዊ ዘገባው አፍሪቃ ከሰላሣ ዓመታት መጎተት በኋላ ከተቀረው ዓለም ጋር አብራ ለመራመድ እንደበቃች ነበር ያመለከተው። ከሣሃራ በስተደቡብ የሚታየው ዕድገት ደግሞ ኢትዮጵያንም እንደሚጠቀልል ነው ሲነገር የቆየው።

የድርቅ ገጽታ

የድርቅ ገጽታ

ጠቅላይ ሚኒስትር መለስ ዜናዊ ትናንት የኢትዮጵያን ምጣኔ-ሐብት ይዞታ አስመልክተው ፓርላማ ውስጥ ባሰሙት ንግግር የአገሪቱ ኤኮኖሚ በዚህ በያዝነው የጎርጎሮሣውያን 2008 ዓ.ም. የ 10.8 ከመቶ ዕድገት እንደሚያሳይ ተንብየዋል። እንዳለፉት ጥቂት ዓመታት ሁሉ ዕርምጃችን የተሳካ ነው ብለውም ነበር። የውጭ ንግዱም ወደ 32 ከመቶ ከፍ እንደሚል ነው የተናገሩት። ይህ የዕድገት ግምት የቀረበው ደግሞ የኑሮ ውድነት በአገሪቱ ሃያ በመቶ መድረሱና ዘጠኝ ሚሊዮን ያህል ሕዝብ የድርቅ ሰለባ መሆኑ፤ በዚህ ዓመት ውስጥ የምግብ ዕርዳታ አስፈላጊ መሆኑም በሚነገርበት ወቅት ነው።

በተለይ የኑሮ ውድነት ዛሬ ብዙሃኑን በዝቅተኛ ገቢ የሚተዳደሩ ዜጎችን መከራ እያሳየ ያለና ከሕልውና አደጋ ላይ የጣለ ጉዳይ መሆኑ የተሰወረ አይደለም። እርግጥ መንግሥት ባለፉት ዓመታት የነዳጅ ዘይት፣ ዕሕልና ሢሚንቶን የመሳሰሉ ምርቶችን የዋጋ ንረት ለማለዘብ 450 ሚሊዮን ዶላር ያህል የድጎማ ወጪ ማድረጉ ተነግሯል። ይሁንና ችግሩን ለማስታገስ መቻሉ ጎልቶ አይታይም። መለስ ዜናዊ በበኩላቸው የችግሩ መባባስ መንስዔ በዓለምአቀፍ ደረጃ የበርካታ ምርቶች ዋጋ መናር እንደሆነ ነው በትናንት ዘገባቸው ያስገነዘቡት። አንዳንድ ተቃዋሚ የፓርላማ ዓባላት በአንጻሩ የችግሩ መሠረት ቤት-ሠራሽ እንደሆነ ዕምነታቸውን ገልጸዋል። ለምሳሌ ያህል አቶ ቡልቻ ደመቅሣ!

እርግጥ አዝማሚያው የዕድገት መሆኑ ጭብጥና የማይታበል ሃቅ ነው። ቢሆንም ባለፉት አምሥት ዓመታት ውስጥ አሥር በመቶ ዕድገት እያሳየ መምጣቱ የሚነገርለት የኤኮኖሚ ዕርምጃ የብዙሃኑን የኑሮ ሁኔታ እንዲያሻሽል ሆኖ ገቢር አልሆነም። የተቃዋሚው ወገን እንደራሴና የዩኒቨርሲቲው ፕሮፌሰር ዶር/ መራራ ጉዲናም የተባለው ዕድገት ድህነትን እንዳልቀነሰ ሲያመለክቱ መንግሥት አገኘሁ የሚለው የኤኮኖሚ ስኬት እንደተለመደው በጭብጥ መረጃዎች ላይ የተመሠረተ እንዳልነበረም ተናግረዋል። የዕድገቱን ተሥፋ “ላም አለኝ በሰማይ” ብለውታል።
ዘገባው የተሟላ አለመሆኑን ካስረዱት እንደራሴዎች መካከል አቶ ተመስገን ዘውዴም ይገኙበት ነበር።

ዘገባው በብዙ የኤኮኖሚ ጠበብት ዘንድም ቅራኔ-አዘል ሆኖ መታየቱ አይቀርም። ዕድገቱ በዕውነት ተጨባጭ ነወይ? ማሕበራዊ ለውጥን ማስከተል ይቻላል? ቀጣይ የመሆኑስ አስተማማኝነት ምን ያህል ነው? የበርሊኑ የከፍተኛ ትምሕርት ተቋም መምሕር ዶር/ፈቃዱ በቀለ በቅርቡ አመልክተውት እንደነበረው ከሆነ የእስካሁኑ ፖሊሲ ድህነትን፣ ረሃብንና የሥራ አጥነት ችግርን በመፍታቱ በኩል ጨርሶ አላራመደም፤ አያራምድምም።

በአጠቃላይ አፍሪቃ ውስጥ ባለፉት ዓመታት ያልተቋረጠ ዕድገት ሲደረግ መቆየቱ አነሰም በዛም በየአገሩ የታየ ሃቅ ነው። አዝማሚያው አበረታች መሆኑም አያጠያይቅም። ሆኖም ዕርምጃው በማሕበራዊ ዕድገት መንጸባረቅ መቻሉ፤ ድህነትንም ለመቀነስ መርዳት-አለመርዳቱ የሁሉም ነገር መመዘኛ እንደሚሆን አንድና ሁለት የለውም። ምን ዓይነት? ወይም ማንን የጠቀመ ዕድገት የሚል ጥያቄ መነሣቱ ሁሌም የማይቀር ነው። የኢትዮጵያም ሃቅ ከዚህ ውጭ ሊሆን አይችልም።