1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

አፍሪቃ

የኢትዮጵያዉያን ስደተኞች ስቃይ በግብፅ

በግብፅ የሚገኙ በርካታ ኢትዮጵያዉያን ስደተኞች ስቃይ ላይ ነን ሲሉ ጥሪ አቀረቡ። ስደተኞቹ ለዶይቼ ቬለ ባስተላፉት መልዕክት እንደገለፁት በሽዎች የሚቆጠሩ ኢትዮጵያዉያን ታስረዋል። ካይሮ ለሚገኘዉ የኢትዮጵያ ኤምባሲ አሳዉቀን ነበር፤ በባህር ለማለፍ የፈለጋችሁ ናችሁ፤ ምንም ዓይነት ወረቀት የላችሁም ብለዉ የፈየዱልን ነገር የለም ሲሉም ተናግረዋል።

አውዲዮውን ያዳምጡ። 04:06

ወደ ሃገራችን እንድንመለስ መንግስት ይርዳን

 

ሌሎች በመቶዎች የሚቆጠሩ ደግሞ በሕገ ወጥ አመላላሽ ግብጻዉያን ገንዘባቸዉ ተወስዶ አሁንም ገንዘብ ካላመጣችሁ ወደምትፈልጉበት አትሄዱም ተብለዉ በአንድ ቤት ታጉረዉ ነዉ የሚገኙት። የሚጠጣ ዉኃና የሚበላ ምግብ እንኳን አጥተን በስቃይ ላይ ነን የሚሉት ኢትዮጵያዉያኑ የኢትዮጵያ ኤምባሲ ሊረዳን አልቻለም ብለዋል።   

ኢትዮጵያዉያኑ በደላሎች ከግብጽ መዲና ካይሮ ወደ አሌክሳንድርያ ለመሻገር ችለን ነበር ይላሉ። አሌክሳንድርያ ከመጣን በኋላ ደግሞ ግብፃዉያን  ወደ አዉሮጳ በመርከብ እንድንጓዝ ከእያንዳንዳንችን 2000 ዶላር ተቀብለዉን ከዛሬ ነገ እንሄዳለን ብለን ስንጠብቅ ወራቶች አለፈን ። አሁን ደግሞ ሌላ ብር ካላመጣችሁ አትሄዱም እያሉን ነዉ ብለዋል። የድረሱልን ጥሪ ከአሌክሳንድርያ ግብፅ በስልክ ያስተላለፉት ኢትዮጵያዊ  ለደህንነታቸዉ ሲሉ ስማቸዉ እንዲገለጽ አልፈለጉም።   

ካይሮ ለሚገኘዉ የኢትዮጵያ ኤምባሲ አሳዉቀን ነበር፤ በባህር ለማለፍ የፈለጋችሁ ናችሁ፤ ምንም ዓይነት ወረቀት የላችሁም ብለዉ የፈየዱልን ነገር የለም ሲሉ ኢትዮጵያዊትዋ ተናግረዋል።  በርካታ ኢትዮጵያዉያን በእስር ቤት ይገኛሉ፤ እዚህ ያለዉ ኢትዮጵያ ኤምባሲ ሊተባበረን ስላልቻለ፤ መንግስት ስሞታችንን ሰምቶ ወደ ሃገራችን ይመልሰን ያለን ሌላዉ ለደላሎች ሁለት ሺህ ዶላር የከፈለ ኢትዮጵያዊ  ነዉ። ስለጉዳዩ በካይሮ የኢትዮጵያ ኤምባሲን ሃላፊዎች ለማነጋገር ያደረግነው ሙከራ አልተሳካም።

አዜብ ታደሰ

ኂሩት መለሰ

Audios and videos on the topic