1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

ዓለም

የራድዮ አሰና የሳተላይት ሥርጭት መቋረጥ

ራድዮ አሰና የተባለው ከለንደን የሚተላለፈው የኤርትራ መንግሥት ተቃዋሚ የራድዮ ጣቢያ የሳተላይት ሥርጭቱን ማቋረጡን አስታወቀ ። የጣቢያው መሥራችና ዋና አዘጋጅ አቶ አማኑኤል ኢያሱ የራድዮ አሰና የሳተላይት ሥርጭት የቆመው የገንዘብ ድጋፍ በመታጣቱ ነው ። ነው ብለዋል ። ጣቢያው ገንዘብ ካገኘ ግን የሳተላይት ሥርጭቱን የመቀጠል እቅድ አለው ።

ራድዮ አሰና ላለፉት 6 ዓመት ከለንደን በዋነኛነት ወደ ኤርትራና አካባባቢዋ እንዲሁም ወደ መካከለኛው ምሥራቅ ሃገራት ልዩ ልዩ ዝግጅቶችን የሚያስተላለፍ ጣቢያ ነው ። የጣቢያው መሥራችና ዋና አዘጋጅ አቶ አማኑኤል ኢያሱ ጣቢያው የግል ፕሬስ በሌለባትና የመንግሥት መገናኛ ብዙሃን ብቻ በሚደመጥባት ኤርትራ የተሟላ የመረጃ ምንጭ ሆኖ እንዲያገልግል ታስቦ የተቋቋመ መሆኑን ለዶቼቬለ ተናግረዋል ።
ይህን ዓላማ ይዞ በአጭር ሞገድ በሳምንት ሰወስቴ-ለየ-አንድ ሰዓት፤ ሳምንቱን በሙሉ ለ24 ሰዓታት በሳተላይትና በድረገፅ ደግሞ በየቀኑ የአንድ ሰዓት ስርጭቱን ሲያስተላልፍ የቆየው ራድዮ አሰና ካለፈው እሁድ አንስቶ በሳተላይት ማስተላለፉን አቁሟል ። አቶ አማኑኤል እንደተናገሩት ምክንያቱ የገንዘብ እጦት ነው ።

የቀድሞ የኤርትራ ማስታወቂያ ሚኒስቴር ባልደረባ የነበሩት አቶ አማኑ ኤል እንደሚሉት የራድዮ አሰና የሳተላይት ሥርጭት ብዙ አካባቢዎችን የሚያዳርስ ነበር ። በተለይ ኤርትራ ለሚገኙ አድማጮች የተለየ ጠቀሜታም ነበረው ።
ለጣቢያው ሳይሰለቹ የገንዘብ ድጋፍ ሲያደርጉ የቆዩ ሰዎችን ደግሞ ደጋግሞ ማስቸገሩ ስለከበደን የሰተላይት ስርጭቱን ለማቋረጥ ተገደናል የሚሉት አቶ አማኑኤል የተጠናከረ ድጋፍ ከተገኘ ግን ስርጭቱ የማይቀጥልበት ምክንያት አይኖርም ይላሉ ።

ኂሩት መለሰ

ነጋሽ መሀመድ

Audios and videos on the topic