1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

አፍሪቃ

የሞሪሽየስ እና የአውሮጳ ህብረት ስምምነት

ደሴቲቱ ሞሪሽየስ 35 ሶማልያውያን የባህር ወንበዴዎችን በሀገሯ ለማሰርና ለፍርድ ለማቅረብ ዝግጁ መሆንዋን አስታወቀች። የሞሪሽየስ መንግሥት ይህን ስምምነቱን ሰሞኑን ከአውሮጳ ህብረት ጋ በተፈራራረመው ውል አረጋግጦዋል።

የአውሮጳ ህብረት የሞሪሸየስ መንግሥት በቁጥጥር የዋሉትን የባህር ወንበዴዎች ለሚቀበልበት፡ እንዲሁም፡ በወህኒ አቆይቶ ፍርድ ፊት ለሚያቀርብበት ስምምነቱ ሦስት ሚልዮን ዩሮ እንደሚሰጥ አስታውቋል። ይኸው የሞሪሸየስ መንግሥት ውሳኔ ያልደገፉት በሀገሪቱ የሚገኙት ሲቭል ማህበረሰብ አባላት መንግሥት ይህን ርምጃ የወሰደበትን ምክንያት ማጠያየቅ ይዘዋል።
ሞሪሽየስ ዓለም አቀፉን ማህበረሰብ እያወከ ያለውን የባህር ላይ ውንብድና ሞሪሽየስ ተመልካች በመሆን ልታሳልፈው እንደማይገባ የሀገሪቱ መንግሥት ይናገራል። የሞሪሽየስ መንግሥት ጠቅላይ ሚንስትር ናቪን ራምጉላም እንዳስረዱት፡ በሕንድ ውቅያኖስ የሚፈፀመው የባህር ላይ ውንብድና ሞሪሽየስ በባህሩ መሥመር ወደ ሀገሯ በምታስገባው እና ከሀገሯ በምትልከው ንግድ፡ እንዲሁም፡ በዋነኞቹ የሀገሪቱ የኤኮኖሚ ምሰሶ በሆኑት በአሣ ማስገሩ እና በቱሪዝሙ ዘርፎች ላይ አሉታዊ ተፅዕኖ አሳርፎዋል። በመሆኑም፡ ሀገራቸው የባህር ላይ ወንበዴዎችን እሥርና ፍርድን በተመለከተ ከአውሮጳ ህብረት ጋ የደረሰችውን ስምምነት ትክክለኛ ነው ሲሉ ለሀገራቸው ምክር ቤት ማብራሪያ ሰጥተዋል። 

Prime Minister of Mauritius Navinchandra Ramgoolam speaks at the 66th United Nations General Assembly at U.N. headquarters, Saturday, Sept. 24, 2011. (AP Photo/John Minchillo)

የሞሪሽየስ ጠቅላይ ሚንስትር ናቪን ራምጉላም


« ይኸው ክስተት እጅግ ትልቅ ደረጃ ላይ በመድረሱ አንዲት ሀገር ብቻዋን ልታሸንፈው አትችልም። የባህር ላይ ወንበዴዎችን ከዚሁ ተግባራቸው ለማከላከል በአንፃራቸው ጠንካራ ክትትል ማድረጉ አንዱ ዋነኛ ዘዴ ነው። አንዳንድ ተይዘው የነበሩ የባህር ወንበዴዎች በፃ ሲለቀቁ አይተናል። በዚህም የተነሳ ነው በኤኮኖሚያችንም ላይ ጉዳት ስለሚያደርሱ በአንፃራቸው ቀጣይ ክትትል እንዲደረግ ከአውሮጳ ህብረት ጋ ስምምነት የተፈራረምነው። ህብረቱ እሥረኞቹን የምንቀበልበትን እና ለፍርድ የምናቀርብበትን፡ እንዲሁም፡ አንድ ወህኒ ቤት እና አዲስ ፍርድ ቤት የሚሰራበትን ወጪ ይሸፍናል። »


የመጀመሪያው የባህር ወንበዴዎቹ ችሎት መቼ እንደሚጀመር ገና ቀን አልተቆረጠም። እርግጥ ብዙው የሞሪሽየስ ሕዝብ በዚህ ጉዳይ ላይ የሀገሩ መንግሥት በወሰደው ውሳኔ ላይ ጣልቃ አልገባም። ግን፡ የአንድ ሲቪል ማህበረሰብ አባል የሆኑት አሾክ ሱብሮን የመንግሥቱ ውሳኔ ትክክለኟ እንዳልሆነ ነው ያመለከቱት።
« የሞሪሽየስ መንግሥት በሚገባ ሳያጤን ነው ይህን ውሳኔ የወሰደው።  በኛ አካባቢ ብዙ ግዛቶች ያሉት የአውሮጳ ህብረት የባህር ወንበዴዎቹን ችሎት ለምን በሞሪሽየስ ደሴት ለማካሄድ መወሰኑ አስገርሞኛል። በተለይ በሶማልያ የባህር ጠረፍ አካባቢ ለተስፋፋው የባህር ላይ ውንብድና ተጠያቂዎቹ ያካባቢውን የአሣ እና በባህሩ ያለውን የተፈጥሮ ሀብት የሚበዘብዙት አውሮጳውያኑ መርከቦች መሆናቸው ሲታሰብ፡ ሕዝባችንን በማይመለከተው በዚሁ ጉዳይ ሰበብ ደሴታችንን አስጊ ሁኔታ ላይ መጣል አስፈላጊ አይደለም። » 
ዓለም አቀፉ የባህር ላይ ጉዞ ተከታታይ ጽሕፈት ቤት እንደሚገምተው ግን፡ የባህር ላይ ውንብድና እየቀነሰ በመሄዱ የባህር ወንበዴዎች ወደፊት በሞሪሽየስ ደሴት እንዲታሰሩ እና ችሎታቸውም በዚያ እንዲካሄድ ከአውሮጳ ህብረት ጋ የተደረሰው ስምምነት ጊዚያዊ ነው የሚሆነው። በ 2012 ዓም የመጀመሪያው አጋማሽ 69 የባህር ላይ ወንበዴዎች መያዛቸው ሲመዘገብ አምና በዚሁ ጊዜ  የተያዙት 163 ነበሩ። የባህር ላይ ውንብድና ለቀነሰበት ድርጊት፡ እንደ ዓለም አቀፉ የባህር ላይ ጉዞ ተከታታይ ጽሕፈት ቤት አስተያየት፡ መርከቦች በታጠቁ የፀጥታ ቡድኖች ከለላ ማግኘት የጀመሩበት አሰራር ነው።
 

አርያም ተክሌ
መሥፍን መኮንን