ዚምባብዌና አምባገነኑ መሪዋ | አፍሪቃ | DW | 14.03.2007
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

አፍሪቃ

ዚምባብዌና አምባገነኑ መሪዋ

በፖሊስ ቁም ስቅል ያዩት ሞርገን ሽቫንጊራይ

default

የዚምባብዌው መሪ ሮበርት ሙጋቤ ከአንፀባራቂ የነፃነት ታጋይነት እና ከአፍሪቃ የነፃነት ጀግናነት ወደ አምባገነንነት ተቀይረው መላ ህዝባቸውን ያገቱ ሰው ናቸው ። በደፈጣ ውጊያ የነጮችን ቅኝ አገዛዝ ያስወገዱት ሙጋቤ በተገላቢጦሹ ፈላጭ ቆራጭና ዘረኛ የቅኝ ገዥዎችን መሰል ፖለቲካ እያራመዱ ነው ። ይህ ደግሞ ለአገሪቱ ጥፋት የሚያመጣ ነው ። ስልጣናቸውን ለማደላደልም አዲስ ፀረ ኮሎኒያሊዝም ዘመቻ እንደተያያዙ እንዲታወቅላቸው ይፈልጋሉ ። የነጮችን ፖለቲካ ይነቅፋሉ ። በተለይ ብሪታኒያና አሜሪካን አገራቸውን ለውድቀት እንደዳረጉዋት አድርገው ነው የሚያቀርቡት ። ሆኖም ግን እርሳቸው ተጠያቂ ያደረጉዋቸው አይደሉም ጥፋተኞቹ ። ዚምባብዌን ያደሀይዋት እርሳቸው እንጂ ሌላ ማንም ሊሆን አይችልም ። ሀገሪቱ ነፃ ከወጣችበት እአአ ከሺህ ዘጠን መቶ ሰማንያ አንስቶ የሚመርዋት እርሳቸው ናቸው ። ሙጋቤ የሚያራምዱት ሀላፊነት የጎደለው ፖሊሲ ነው የዚምባብዌን የውጭና የውስጥ ንግድ እንዲዳከም በፖለቲካውም ሀገሪቱ እንድትገለል ያደረገው ። ሙጋቤ ፖለቲካ ህዝብን ለማገልገል የኑሮ ዋስትናን ለማረጋገጥ የሚበጅ መሆን እንዳለበት ከዘነጉት ረዥም ጊዜ ሆኗል ። በአሁኑ ሰዓት ከዓለማችን እጅግ ከፍተኛው የዋጋ ግሽበት ያለው በዚምባብዌ ነው ። በአሀዝ ሲቀመጥ ግሽበቱ አንድ ሺህ ሰባት መቶ በመቶ ነው ። ሰማንያ በመቶው የዚምባብዌ ዜጋ ስራ አጥ ነው ። የነዳጅ ፣ የስጋና ፣ የዳቦ ዕጥረት አለ ። እንዲሁም የኤሌክትሪክ አቅርቦት ወደ መንኮታኮቱ ተቃርቧል ። በዚህ ዓመት ሀገሪቱ ከሚያስፈልጋት በቆሎ ግማሽ ያህሉ ብቻ ነው የተመረተው ። የቀድሞዋ የአፍሪቃ የዕህል ጎተራ ዚምባብዌ ለረሀብ ተዳርጋለች ። ዚምባብዌ ከነፃነት በኃላ ከደቡብ አፍሪቃ ጎን በኢኮኖሚው መስክ የስኬት ታሪክ ባለቤት የመሆን በርካታ ዕድሎች ነበርዋት ። ዝምድናና የጥቅም ግንኙነት እንዲሁም ሙስና የሙጋቤ ስርዓት የሚከተለው አሰራር ነው ። የአብዛኛው ድሀ ህዝብ ዕጣ ፈንታም በዚህ አሰራር ውስጥ ነው የወደቀ።
ሙጋቤ በሺህ የሚቆጠሩ ነጭ ገበሬዎችን አባረው የእርሻ መሬቶችን ርሳቸው ለመረጡዋቸው አከፋፍለዋል ። አብዛኛዎቹ በእርሻ ስራ የተሰማሩት ሰራተኞች ግን ባዶ እጃቸውን ነው የቀሩት ። የዚምባብዌ ህዝብ ነፃ ከወጣ ወዲህ ሌላ ፕሬዝዳንት አያውቅም ። በተቃዋሚው ሞርገን ስቫንጋራይ ላይ መንግስት ሊወስድ ይችላል በሚባለው ዕርምጃ ሰዉ በፍርሀት እየተርበደበደ ነው ። በህዝቡ ላይ ጥልቅ የሆነ የተስፋ መቁረጥ ስሜት ነው የሚታየው ። ሙጋቤ ግን በሚቀጥለው ዓመት ከሚካሄደው ምርጫ በኃላም ከዚህ አቋማቸው ፍንክች ሳይሉ ማስተዳደር እንደሚፈልጉ ነው ያሳወቁት ። ይህ ዕውን የሚሆን ከሆነ ሀገሪቱ ሰራተኛውን አገር ገንቢው ህዝቧን ታጣለች ። የሚችል ሁሉ ሀገሪቱን ለቆ መሰደዱ አይቀርም ። ይሁንና የተቃዋሚው የሞርጋን ስቫንጊራይ መታሰርና ቁምስቅል ማየት ሁኔታዎችን ሊለውጥ ይችላል ። በዚምባብዌ መንግስት ላይ ነቀፌታው ከውስጥም ከውጭም እንዲሁም ከራሳቸው ፓርቲ ጭምር እየጠነከረ በመሄድ ላይ ነው ። ዕርግጥ ነው ተስፋ የቆረጠው ህዝብ ለሰላሳ ዓመታት ሰጥለጥ አድርገው ከገዙት ከፈላጭ ቆራጩ ሙጋቤ በቀላሉ መገላገሉ ተስፋ የሚጣልበት አይደለም ። ይህ ሊሆን ይችላል ተብሎ የሚታሰበው ግን ከራሳቸው ፓርቲ ግፊቱ ተጠናክሮ ከቀጠለ ነው ። በዚህ ላይ የውጭ አገራትም ትልቅ ሚና ሊጫወቱ ይችላሉ ። በዚምባብዌ ለውጥ እንዲመጣ ከጎረቤት አገራት ደቡብ አፍሪቃ በተጨማሪም የአፍሪቃ ህብረት ትልቁ ድርሻ ይኖራቸዋል ።