1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

አፍሪቃ

በቡሩንዲ ያልታጠቀ ፖሊስ እንዲሰማራ የተ.መ.ድ. ውሳኔ አሳለፈ

የተባበሩት መንግሥታት ድርጅት የጸጥታው ምክር ቤት ግድያ እና ማሰቃየት ተስፋፍቶባታል ባላት ቡሩንዲ ፖሊሶችን ለማሰማራት በሙሉ ድምጽ ውሳኔ አስተላለፈ።

የተባበሩት መንግሥታት ድርጅት የጸጥታው ምክር ቤት ግድያ እና ማሰቃየት ተስፋፍቶባታል ባላት ቡሩንዲ ፖሊሶችን ለማሰማራት በሙሉ ድምጽ ውሳኔ አስተላለፈ። የውሳኔ ኃሳቡን የተባበሩት መንግሥታት ድርጅት ዋና ጸሐፊ ባን ኪ ሙን የቡሩንዲን መንግሥት አማክረው እና የአፍሪቃ ሕብረትን አስተባብረው የፖሊስ ኃይሉ የሚሰማራበትን አማራጭ በአስራ አምስት ቀናት ውስጥ እንዲያቀርቡ ኃላፊነት ሰጥቷል።

በቡሩንዲ የሚሰማራው የተ.መ.ድ. ፖሊስ የሀገሪቱን የጸጥታ ሁኔታ የሚከታተል፤ የሰብዓዊ መብቶች እንዲከበሩ የሚያበረታታ እና የሕግ የበላይነት እንዲከበር የሚሠራ ነው መባሉን አሶሼትድ ፕሬስ ዘግቧል። ፕሬዝዳንት ፒየር ንኩሩንዚዛ ለሦስተኛ የስልጣን ዘመን ለምርጫ ለመወዳደር በመወሰናቸው ምክንያት በቡሩንዲ የተቀሰቀሰውን ኹከት እና አለመረጋጋት ለመቆጣጠር የአፍሪቃ ሕብረት ያቀረበው የሰላም አስከባሪ ወታደሮች የማሰማራት ሃሳብ ተቀባይነት ሳያገኝ መቅረቱ አይዘነጋም። በተ.መ.ድ. የቡሩንዲ አምባሳደር አልበርት ሺንጊሮ መንግሥታቸው ስለ ተልዕኮው አይነት፤ ብዛት እና ስለሚኖረው ኃላፊነት ለመወያየት ፈቃደኛ መሆኑን መናገራቸውን አሶሼትድ ፕሬስ ዘግቧል። የተ.መ.ድ. የውሳኔ ኃሳብ በቡሩንዲ ይፈጸማሉ ያላቸውን ግድያ፤ ወሲባዊ ጥቃት፤ ማሰቃየት፤ በሰብዓዊ መብት ድርጅቶች ላይ የሚፈጸም ማዋከብ እና የጋዜጠኞችን መሠረታዊ መብት ማፈንን አውግዟል።

እሸቴ በቀለ

ሸዋዬ ለገሠ