1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

አፍሪቃ

ሪክ ማቸር መዲና ጁባ ተመለሱ

የማቸር ጁባ መግባት ብሔራዊ የአንድነት መንግሥት ለመመሥረት የተደረገዉን ሥምምነት ገቢራዊ ለማድረግ ከሚያስፈልጉ ቅድመ-ጉዳዮች ዋነኛዉ ነዉ።

አውዲዮውን ያዳምጡ። 04:06

ሪክ ማቸር ተመለሱ

ላለፉት ሁለት ዓመታት የደቡብ ሱዳን አማፂ ቡድንን የመሩት ሪክ ማቸር ዛሬ የሐገሪቱ ብሔራዊ የአንድነት መንግሥት ምክትል ፕሬዝደንት ሆነዉ ቃለ መሐላ ፈፅሙ።ማቻር የሚመሩት አማፂ ቡድን ከፕሬዝደንት ሳልቫ ኪር መንግሥት ጋር ባለፈዉ ነሐሴ በተፈራረመዉ ዉል መሠረት ብሔራዊ የአንድነት መንግሥት መመሥረቱ ሁለት ዓመት ያስቆጠረዉን ጦርነት ለማስቆም እንደ ሁነኛ እርምጃ የሚታይ ነዉ።

እንዲያም ሆኖ ማቻር ዛሬ ጁባ የገቡት የሠላም ስምምነቱ ለተደጋጋሚ ጊዜ ገቢራዊ ሳይሆን ከቀረ በኋላ መሆኑ ይታወቃል። ማቻር ዛሬ ከኢትዮጵያዋ ጋምቤላ ከተማ ወደ ጁባ የተጓዙት በተባበሩት መንግሥታት ድርጅት አዉሮፕላን መሆኑ ተዘግቧል። የደቡብ ሱዳን ተፋላሚ ኃይላት የፈረሙትን ስምምነት ካላከበሩና ማቻርም እስካለፈዉ ቅዳሜ ድረስ ጁባ ካልገቡ ለጋሽ መንግሥታት እርምጃ ለመዉስድ አስጠንቅቀዉ ነበር።

ማቸር ከዚሕ ቀደም በተቆረጠዉ ቀን ማለት ባለፈዉ ሳምንት ሰኞ ወደ ጁባ ያልሄዱት አስከትለዉ በሚገቡት ጦር ብዛትና በታጠቀዉ የመሳሪያ ዓይነት ሰበብ ከመንግሥት ጋር ባለመግባባታቸዉ ነበር። ባለፈዉ ነሐሴ በተፈረመዉ ዉል መሠረት የማቻር ዘቦች ከ20 አውቶማቲክ ጠመንጃዎችና በሮኬት ከሚወነጨፍ ፈንጂ ዉጪ ሌላ ጦር መሳሪያ መታጠቅ የለባቸዉም።

መንግሥት በበኩሉ የአዉቶማቲኩ ጠመንጃ ቁጥሩ በ7 መገደብ አለበት ሲል ነበር ። በደቡብ ሱዳን የርስ በርስ ጦርነት በአስር ሺሕ የሚቆጠሩ ዜጎች መገደላቸዉና በሚሊዮን የሚቆጠሩ ነዋሪዎች ከቤት ንብረታቸዉ መፈናቀላቸዉና ወደ ጎረቤት ሃገር መሰደዳቸዉ ይታወቃል።

ሥለ ደቡብ ሱዳን ሠላም የናይሮቢ ወኪላችንን አነጋግረነዉ ነበር።

ፋሲል ግርማ

ነጋሽ መሐመድ

Audios and videos on the topic