«የወገንተኝነት ጉዞ» ለስደተኞች በፈረንሣይ

ስደተኞች ወደፈለጉበት ቦታ የመዘዋወር እና ድንበር የማቋረጥ መብታቸው እንዲከበር የሚጠይቅ እና የሚደግፍ ከፈረንሣይ ጣሊያን ድንበር አንስቶ እስከ ለንደን የሚዘልቅ የእግር ጉዞ በመካሄድ ላይ ይገኛል። ይኽ «የአንድነት ጉዞ» በሚል ስያሜ ፈረንሣይ ውስጥ ሰብአዊ ድጋፍ በሚሰጡ ኹለት ማኅበራት አማካኝነት የተዘጋጀውና በርካታ በጎ ፈቃደኛ ዜጎችን ያሳተፈው እና ባላፈው ሚያዚያ ወር በፈረንሣይ እና በጣሊያን ድንበር መካከል በምትገኘው ቬንተሚል ከተማ የተጀመረው የእግር ጉዞ እስካሁን 1400 ኪሎ ሜትሮችን መሸፈኑ ተገልጧል።

በያዝነው ሳምንትም ተጓዦቹ በርካታ ስደተኞች የሚገኙባት እና ወደ እንግሊዝ ለመግባት ሙከራ የሚደረግባት የካሌ ከተማ ደርሰዋል። ካሌ ውስጥም በሰብአዊ ርዳታ ሰጪ ተቋማት እና እዛ በሚገኙ ስደተኞች ደማቅ አቀባበል ተደርጎላቸዋል። እነዚሁ የእግር ተጓዦች ዓላማቸውን ለማሳካትም ወደ እንግሊዝ በማቅናት ጥያቄያቸውን ለማቅረብ ጉዟቸውን ቀጥለዋል። ከተጓዦቹ መካከል የተወሰኑት በፖሊስ ቁጥጥር ስር መኾናቸው ታውቋል። 

ሃይማኖት ጥሩነህ 
ማንተጋፍቶት ስለሺ
ኂሩት መለሰ