የሶማሌ እና የኦሮሚያ ክልሎችን የተመለከተው የሰመጉ ዘገባ

በኢትዮጵያ ሶማሌ እና በኦሮሚያ መስተዳድሮች አዋሳኝ አካባቢዎች ካለፉት ጥቂት ዓመታት ወዲህ የሚካሔደዉን ግጭት እና የቀጠለውን የሰብአዊ  መብት ጥሰት የኢትዮጵያ መንግሥት  እንዲያስቆም  የሰብአዊ መብቶች ጉባኤ (ሰመጉ) አሳሰበ። ሰመጉ ይህን ማሳሰቢያ ያሰማው ትናንት ግጭቱን በተመለከተ ዝርዝር ዘገባ  ባወጣበት እና  ከኢትዮጵያ ብሔራዊ የአደጋ ስጋት ስራ አመራር ኮሚሽን እና ከተባበሩት መንግሥታት የሰብዓዊ ርዳታ ማስተባበሪያ መሥሪያ ቤት፣ በምህጻሩ ከኦቻ ጋር  በጋራ  መግለጫ በሰጠበት ጊዜ ነው። ዶይቸ ቬለ ያነጋገራቸው የድርጅቱ ተጠባባቂ  ዳይሬክተር አቶ ብያንያም አባተ እንደተናገሩት፣ የሰመጉ ዘገባ ሁለቱን ክልሎች በሚያዋስነው ድንበር ከጥር 2009 እስከ ጥር 2010 ዓም ድረስ ብቻ በነበረዉ ጊዜ የታየውን ግጭት፣ ምክንያቱን  እና መዘዙን ነው የሸፈነው። በተባለው አንድ ዓመት በግጭቶች በብዙ መቶዎች መገደላቸውን አቶ ብንያም  ተናግረዋል።
ይሁንና፣ በአቅም ውሱኑነት እና በፀጥታ ምክንያት የጉባኤዉ ባለሙያዎች ያጣሩት የተወሰኑ አካባቢዎችን ብቻ ስለሆነ ዘገባው የደረሰውን ጉዳት ሙሉ ለሙሉ የሚያሳይ አለመሆኑን አቶ ብንያም አክለው በማስረዳት፣  የሟቾቹ ቁጥር ከተጠቀሰዉ መብለጡ እንደማይቀር ገልጸዋል።
ጉባዔው ከሁለቱ ክልሎች መረጃ ለማግኘት ቢጠይቅም  የኦሮሚያ ብሔራዊ ክልል ባለስልጣናት መረጃ ሊሰጡት እንዳልቻሉ አስታውቆ፣ በዘገባው ያካተተው በመስክ ምርመራ ወቅት በክልሉ ተንቀሳቅሶ ያገኛቸውን የመብት ጥሰት ዓይነቶች፣ ብዛት እና ዝርዝሩን ብቻ መሆኑን አቶ ብንያም አስታውቀዋል።
የኢትዮጵያ ብሔራዊ የአደጋ ስጋት ስራ አመራር ኮሚሽን እና የተባበሩት መንግሥታት የሰብዓዊ ርዳታ ማስተባበሪያ ጽህፈት ቤት በጋራ በሰጡት መግለጫ መሠረት ፣ በኦሮሞና በሶማሌ ክልሎች በብሔር ተኮር ግጭቶችና ጥቃቶች ወደ አንድ ሚሊዮን የሚጠጋ ሕዝብ ተፈናቅሏል፣ እጅግ ብዙ ንብረት ተዘርፏል ወይም ወድሟል። 
የኢትዮጵያ መንግሥት ይህን የሰመጉን ዘገባ በተጨማሪ መሠረት በማድረግ ማስተካከያ ርምጃዎችን እንዲወስድ አቶ ብንያም አባተ ጠይቀዋል።

አርያም ተክሌ

ሸዋዬ ለገሠ