ጠብታ አምቡላንስ

ብዙዎች ስለህክምና ርዳታ ሲያስቡ አስቀድሞ የሚታያቸዉ ዶክተርና ሃኪም ቤት ነዉ። ደጋዉ በደረሰበት ስፍራ የሚሰጠዉ የመጀመሪያ የህክምና ርዳታ አደጋዉ ከባድ ከሆነ የተጎጂዉን ነፍስ ለማትረፍ፤ ደም ፈሶ ከሆነም የማቆም እንዲሁም አቅም ከፈቀደ የመተንፈሻ አካላት በቂ ኦክስጂን እንዲያገኙ ማድረግን በማካተቱ ወሳኝነት ይኖረዋል። የመጀመሪያ ህክምና ርዳታ ሰጪዉ ሙያዊ ስልጠና ያለዉ ከሆነ ደግሞ ተጎጂዉን ከህልፈተ ህይወትም ሆነ በአደጋዉ ምክንያት ሊደርስ ከሚችልም የአካል ጉዳት መታደግ ይቻላል።

ኢትዮጵያ ዉስጥ የግል የአምቡላንስ አገልግሎትን የጀመሩት አቶ ክብረት አበበ አደጋ የደረሰበትን ሰዉ ማንሳቱ ራሱ ሳይንስ እንደሆነ ነዉ የሚያስረዱት። ተጎጂዉን የማዳኑንም ተግባር እዚያዉ እንደሚጀምር ያስረዳሉ። ጠብታ አምቡላንስ በሚል የዛሬ ሶስት ዓመት በሶስት አምቡላንስ ሥራዉን የጀመረዉ ድርጅታቸዉ፤ ዛሬ የአምቡላንሱን ቁጥር አራት አድርሷል። አገልግሎቱም በዋና ከተማ አዲስ አበባ ብቻ ሳይወሰን በተፈለገበት ለርዳታ እንደሚደርስም ይናገራሉ። እንደምኞታቸዉ ቢሆን የአየር አምቡላንስንም ሀገሪቱ ማቅረብ ብትችል፤ ከጎረቤት ኬንያ፤ ደቡብ አፍሪቃም ሆነ ከሌሎች ሀገሮች የሚመጡ አገልግሎቶችን እዛዉ መስራት በተቻለ ይላሉ።

በእሳቸዉ ዓላማና መነሳሳት የተቋቋመዉ ጠብታ የአምቡላንስ አገልግሎት ዛሬ ከአምስት በላይ ቋሚ ሠራተኞችንና ከአስር በላይ አማካሪዎችን ያካተተ ድርጅት ለመሆን መብቃቱንም አቶ ክብረት አበበ ገልፀዉልናል።

ሸዋዬ ለገሠ

አርያም ተክሌ