የታሳሪዎች ሰብዓዊ መብትና የቤተሰቦቻቸዉ ጭንቀት

የመንግሥት መገናኛ ብዙሀን ባለፈው ሳምንት መጨረሻ ላይ ቦርድ በአማራ ክልል አዊ ብሄረሰብ አስተዳደር ዞን በእንጅባራ ማረሚያ ቤት የእስረኞች የምግብ አቅርቦት እና  የጤና ሁኔታ ጥሩ መሆኑንና «ማረሚያ ቤት ከገቡ በኋላም ምንም አይነት የሰብዓዊ መብት ጥሰት እንዳልተፈጸመባቸው» ታራሚዎቹቹ ተናግረዋል ሲሉ ዘግበዋል።

ስለ ቦርዱ መግለጫ አስተያየታቸውን ከጠየቅናቸው መካከል አንድ የአዳማ ነዋሪ ይገኙበታል። «ከቦርዱ የምንሰማቸዉ ነገሮችና በመሬት ያለዉ የሚሆነው በጣም ለየቅል ነዉ» «ኮማንድ ፖስቱ ሳይቋቋም በፊትም ሆነ ከተቋቋመ በዋላ ወከባዉ፣ ድብደባዉና የጅምላ እስር ቀጥለዋል» ይላሉ የአዳማው ነዋሪ ። እንደርሳቸው የእስረኞች መብት አልተጣሰም የሚባለዉ «ቀልድ» ነዉ።

አሁን ባለው ሁኔታ «የታሰረን ሰዉ ሄዶ መጠየቅ ወንጀለኛ ያደርጋል ይላሉ የአዳማው ነዋሪ።

ስማቸው እንዲጠቀስ ያልፈለጉ ሌላ አስተያየት ሰጭ በአርሲ ዞን ሽርካ ወረዳ የሚኖሩት ሁለት ወንድሞቻቸዉ በጦላይ ወታደረዊ ማሰልጠኛ ካምፕ በእስር ላይ እንደምገኙ ለዶቼ ቬሌ ተናግረዋል። እርሳቸዉ እንደሸሹ የሚናገሩት እኝሁ አስተያየት ወንድሞቻቸዉ እንዴት እነደታሰሩና በምን ዓይነት ሁኔታ ላይ እንደሚገኙም ገልፀዋል፣ «መጀመርያ ሲይዟቸዉ ከከተማ ዉስጥ ነበር። ከዛ በኋላ ወደ ጦላይ እንዳሳለፋቸዉ ተናግረዉ ነብር። አንተ ማወቅ ያለብህ የጦላይን ተዉና እዚህ በወረዳችን የታስሩትን ለመጠየቅ ከባድ ሆኖዋል። በዙ ሰዎች ሄደው ለመጠየቅ ፍላጎት ቢኖራቸዉም እኔም እታሰራለዉ በሚል ለደህንነታቸዉ ፈርተዉ ቁጭ ብለዋል። ሄዶ መጠየቅም ይከብዳል። መሄድም አይቻልም።»

ሌላው የአዲስ አበባ ነዋሪ የመንግሥት ሠራተኛ የሆኑት ታናሽ ወንድማቸዉ ከቢሮቸዉ ተወስደው መታሰራቸውን ይናገራሉ ። የታሰሩበትን ምክንያት ማወቅ ግን አልተቻለም ይላሉ።

የአጣሪ ቦርዱ አባላትና ሌሎች የሚመለከታቸዉን የመንግስት አካላት በዚህ ጉዳይ ላይ ማብራርያ እንዲሰጡን ለመጠየቅ ያደረግነዉ ሙከራ አልተሳካም። 

መርጋ ዮናስ

ሂሩት መለሰ