የሶማሊያ ሠላምና የፀጥታዉ ምክር ቤት

የሶማሊያን ሠላም የሚያስከብር አለም አቀፍ ሠራዊት የሚዘምትበት ሁኔታ እንደሌለ የተባበሩት መንግሥታት ድርጅት ዋና ፀሐፊ አስታወቁ።ዋና ፀሐፊ ፓን ጊ ሙን እንደሚሉት በሶማሊያ የሚከበር ሠላም ሥለሌለ ሠላም አስከባሪ ማዝመት አያስፈልግም፥ ይዝመት ቢባልም ሠራዊት ለማዋጣት ፍቃደኛ የሆነ ሐገር የለም።ፓን እንደሚያምኑት ሶማሊያን ከከፋ ትርምስ ለማዉጣት የአፍሪቃ ሕብረት ሠራዊትን ማጠናከሩ ጠቃሚ ነዉ።የሶማሊያ የባሕር ወንበዴዎችን የሚወጋ ጦር ለማዝመት ግን አለም ባንድ አብሯል።አለም አቀፉ ጦር ወንበዴዎቹን ከባሕር ክልል እስከ ሶማሊያ የአየርና የየብስ ግዛት ድረስ ዘልቆ እንዲወጋ የፀጥታዉ ጥበቃ ምክር ቤት ደንግጓል።የዋሽንግተኑ ወኪላችን አበበ ፈለቀ ዝር ዝር ዘገባ አለዉ።