ቫሌታ፤ የአፍሪቃ እና አዉሮጳ መሪዎች ጉባኤ ተጠናቀቀ

በስደተኞች ቀዉስ ላይ ማልታ መዲና ቫሌታ ላይ የተቀመጡት የአዉሮጳ እና የአፍሪቃ መሪዎች ወደ አዉሮጳ ሕገ-ወጥ ስደተኝነትን ለመከላከል የሚያስችል ዉልን አፀደቁ። የመንግስታቱ መሪዎች ዛሬ በሁለተኛ ቀን ጉባዔያቸዉ በተፈራረሙበት የቅድ ስምምነት ላይ የሕገ-ወጥ ስደተኝነትን ለመዋጋት የሚያስችል እንዲሁም በሕጋዊ መንገድ ለሥራ አልያም ለትምህርት ወደ አዉሮጳ ሕብረት ሃገራት መግባት የሚያስችል ስምምነት ላይ መስማማታቸዉ ተመልክቶአል። ለስደተኞች መርጃ የሚሆን ከአዉሮጳ ሕብረት 1.8 ቢሊዮን ይሮ መመደቡም ተመልክቶአል። የአዉሮጳ ሕብረት ኮሚሽን ፕሬዚዳንት ዣን ክሎድ ዩንከር በመግለጫቸዉ የሕገ-ወጥ ስደተኞችን ለመዋጋት የሕብረቱ አባል ሃገራት ተጨማሪ ገንዘብ እንደሚሰጡ ተስፋቸዉን ተናግረዋል። ይኸዉም ከሕብረቱ ሃገሮች የሚጠበቀዉ ገንዘብ በእጥፍ እስከ 3.6 ቢሊዮን ይሮ መሆኑ ታዉቋል። ዣን ክሎድ ዩንከር ስለ ጉባዔዉ በሰጡት ቃለ-ምልልስ
«ስብሰባዉ በወንድማማችነትና በመከባበር ሁኔታ ነዉ የተጠናቀቀዉ። በሁለቱም ወገን የሚታየዉ አንድ አይነት ችግር ሜዲተራንያን ላይ መኖሩን ነዉ። አፍሪቃዉያንን መርዳት አለብን። ምክንያቱም እኛ ካለብን ችግር የበለጠ ከፍተኛ ችግር ስላለባቸዉ ነዉ»
የሕብረቱ ሃገራት የሚሰጡት ገንዘብ፤ ወጣት ዜጎችን ለመደጎም እንዲሁም ከአዉሮጳ ወደ የሀገራቸዉ የሚመለሱትን ዜጎች በኑሮ ለማቋቋም እንደሚዉል ተመልክቶአል። የቀረዉ ገንዘብ ሰዎችን በሕገ-ወጥ መንገድ የሚያዘዋዉሩትን ለመዋጋትና የድንበር ጥበቃን ለማሻሻል እንደሚዉል ተገልፆአል። አፍሪቃ ከአዉሮጳ ሕብረት በየዓመቱ ከ 20 ቢሊዮን ይሮ በላይ የምታገኝ ሲሆን ይህ ማልታ ላይ ስደተኝነትን ለመዋጋት ሊሰጥ የታቀደዉ ገንዘብ ተጨማሪ መሆኑ ተዘግቦአል። በማልታ ዋና ከተማ ቫሌታ ለሁለት ቀናት በዘለቀዉ ጉባዔ ወደ 80 የሚሆኑ የአፍሪቃና የአዉሮጳ ሕብረት መንግሥታትና የመንግሥታት ተጠሪዎች መገኘታቸዉ ታዉቋል።

የኅብረቱ መሪዎች ወደአዉሮጳ የተሻገሩ በርካታ ስደተኞችን ወደየአባል ሃገራቱ ለማከፋፈል ያቀዱት እጅግም ተግባራዊ የሆነ አይመስልም። ያም ሆኖ ግን የስደተኞች መፍለቂያ ከሚባሉ የአፍሪቃ ሃገራት ጋር በተለይ የኤኮኖሚ ስደተኞችን ባሉበት ሊያስቀር የሚችሉ ፕሮጀክቶች ላይ ለመሥራት አቅደዋል። የሁለት ቀናቱ ጉባኤ ሲጠናቀቅ የደረሰባቸዉን የዉሳኔ ነጥቦች በተመለከተ ብራስል ከሚገኘዉ ዘጋቢያችን ገበያዉ ንጉሤ ጋር ስቱዲዩ ከመግባታችን በፊት በስልክ ተወያይተናል።

ገበያዉ ንጉሤ

ሸዋዬ ለገሠ
አርያም ተክሌ