ሉፍታንዛ ወደ አስመራ በረራ ማቆሙ

የጀርመን አየር መንገድ የሆነው ሉፍታንዛ እስከ ጥቅምት 17, 2006 ዓ ም ድረስ ከፍራንክፈርት-አስመራ በሳምንት ሶስት ቀን ይበር ነበር። ይሁንና በጀርመን እና በኤርትራ መንግስት መካከል መሟላት የነበረባቸው የአየር ትራንስፖርት ደንቦች ባለመቅረባቸው፤ ለጊዜው ወደ አስመራ በረራውን ማቋረጡን ሉፍታንዛ ይፋ አድርጓል። ሆኖም አየር መንገዱ ሁለቱ አገሮች ስምምነት ላይ ሊደርሱ ያልቻሉበትን ምክንያት አልገለጸም።

በጥቅሉ « የአየር ትራንስፖርት ደንቦች ባለመሟላታቸው ስምምነቱ አልተራዘመም፤ በዚህም የተነሳ በረራው ሊቋረጥ ችሏል» ያሉት ስማቸው እንዲጠቀስ ያልፈለጉት የሉፍታንዛ የሕዝብ ግንኙነት ባልደረባ፤ አክለውም ይህን አስመልክቶ በሁለቱ ሀገራት ስለሚደረገው ድርድር የበለጠ መረጃ እንደሌላቸው ተናግረዋል።

«እኛ እንደ አንድ የአየር መንገድ ወደ ሌላ ሀገር እንድናበር የሚፈቀድልን የተወሰነ የበረራ ብዛት አለ።» ይህ የስምምነቱ አካል ነውም ብለዋል። ከዚህም ሌላ ከመጨው ታህሳስ ወር ጀምሮ ወደ ጋቦን እና ዴሞክራቲክ ሪፖብሊክ ኮንኮ ሉፍታንዛ በረራውን ሙሉ በሙሉ እንደሚያቆም ሮይተርስ የዜና ወኪል ዘግቧል። ወደእነዚህ ሃገራት የሚደረጉ በረራዎች መቆም ምክንያት የሉፍታንዛ አየር መንገድ ትርፋማ አለመሆን እንደሆነም ዘገባው ያስረዳል። ይሁንና ሉፍታንዛ ወደ አስመራ -ኤርትራ በረራውን ያቋረጠበት ምክንያት ትርፋማ ካለመሆን ጋ ፍፁም እንደማይገናኝ ቃል አቀባዩ አስታውቀዋል።

በትክክል የሚታወቀው ግን በረራው ለጊዜው እስከ ህዳር 15, 2006 ዓ ም ድረስ መቋረጡን ነው። ከፍራንክፈርት ተነስቶ ወደ አስመራ የሚበር ብቸኛ አየር መንገድ እንደሆነ የገለፀው ሉፍታንዛ፤ በረራው በመቋረጡ የተነሳ፤ አዲስ ተሳፋሪዎችን እንደማይቀበል ቃል አቀባዩ ዛሬ ለዶይቸ ቬለ ተናግረዋል። በረራው የማቋረጡ ርምጃ ከመወሰዱ አስቀድሞ ቲኬት የገዙ ተሳፋሪዎችን በተመለከተ ደግሞ ሲያስረዱ ከሉፍታንዛ ጋ በትብብር ከሚሠራው የግብፅ አየር መንገድ- ማለት «ኢጂብት ኤር» ጋር በመስማማት ሉፍታንዛ መንገደኞቹን በካይሮ በኩል አሳፍሮ እንደሚልክ ዘርዝረዋል።

እስከ ኅዳር 15 ሉፍታንዛ ምን ለውጥ ይጠብቃል ለሚለው ጥያቄ፤ «አስፈላጊ የሆኑት ደንቦች ተሟልተው በሳምንት ሶስት ጊዜ በረራችንን ወደ አስመራ እንቀጥላለን ብለን ተስፋ እናደርጋለን» የሚል ነዉ የአየር መንገዱ የሕዝብ ግንኙነት መልስ።

ልደት አበበ

ሸዋዬ ለገሠ